پاکستان تشقی ایشلر وزیری محمد اسحاقدار، مملکتی «افغانستان حدودیدن پاکستانگه تهدید سالهیاتگن تروریزمگه قرشی کورهشیش اوچون انیق و ایشانچلی نظارت میکانیزمینی یرهتیشنی صبرسیزلیک بیلن کوتیشنی» ایتگن.
اونینگ سۉزلریگه کۉره، بو میکانیزم تورکيه مېزبانلیگیده اۉتهدیگن نوبتدهگی ییغیلیشده تشکیل اېتیلیشی کوتیلماقده.
اسحاقدار پاکستان و طالبان اۉرتهسیدهگی دوحهده اېریشیلگن کېلیشوونی آلقیشلب، اونی «تۉغری یۉلدهگی بیرینچی قدم» دېب اتهگن.
او بوگون (یکشنبه، 27 میزان) ایکس صحیفهسیده «بیز صبرسیزلیک بیلن تورکيه مېزبانلیگیدهگی نوبتدهگی ییغیلیشده افغانستان حدودیدن پاکستانگه یۉنهلگن تروریزم تهدیدلریگه قرشی کورهشیش اوچون انیق و ایشانچلی نظارت میکانیزمینی یرهتیشنی کوتماقدهمیز» دېب یازدی.
پاکستان تشقی ایشلر وزیرینینگ تأکیدلهگنچه، «انسانلر حیاتینی سقلب قالیش اوچون برچه چاره-تدبیرلر کۉریلیشی جوده مهم.»
پاکستان مدافعه وزیری خواجه محمد آصفنینگ ایتیشیچه، طالبان بیلن کېینگی مذاکرهلر 25 اکتوبر کونی تورکيهنینگ استانبول شهریده اۉتکزیلهدی و اونده اَیریم تفصیلاتلر محاکمه قیلینهدی.
پاکستان مدافعه وزیری، طالبان بیلن اېریشیلگن کېلیشوودن سۉنگ، «افغانستان حدودیدن پاکستانگه قرشی تروریزم زنجیری درحال تۉختهتیلهدی،» دېیه بیانات بېرگن.
طالبان سۉزلاوچیسی ذبیحالله مجاهد، طالبان و پاکستان اۉرتهسیدهگی مذاکرهلرده «ایکّی دولت بیر-بیریگه نسبتاً دشمنانه حرکتلر قیلمسلیک همده پاکستان حکومتیگه قرشی فعالیت یوریتهیاتگن گروهلرنی قۉللب-قوّتلهمسلیک» تۉغریسیده قرار قبول قیلینگنینی حقیده تاکیدلهگن.
مجاهدنینگ سۉزلریگه کۉره، طالبان و پاکستان نمایندهلری اۉرتهسیدهگی مذاکرهلر قطرده امضالنگن بیتیم بیلن یکونلنگن.
اونینگ ایتیشیچه، ایکّی تامان هم تینچلیک، اۉز ارا حرمت و یخشی قۉشنیچیلیک مناسبتلریگه صادق قالیشینی تأکیدلهگن.
شونینگدېک مجاهد، تامانلر برچه معمالرنی مذاکره یۉلی بیلن حل قیلیشگه، تۉلیق و مضمونلی اۉت آچیشنی تۉختهتیشگه کېلیشگنینی بیلدیرگن.
طالبان و پاکستان اۉرتهسیده توزیلگن کېلیشووده، هېچ قندهی هجوم حربيلر، تینچ اهالی یاکه بیر-بیری نینگ تاسیساتیگه قرشی عملگه آشیریلمهیدی دېیه تیلگه آلگن.
اونینگ سۉزلریگه کۉره، کېلگوسیده قطر و تورکيه واسطهچیلیگیده ایکّی تامان نینگ دعوالرینی اۉرگنیش و بیتیمنی عملده بجریلیشینی تأمینلش اوچون مخصوص میکانیزم یرهتیلهدی.
پاکستان تامانینینگ قۉشیمچه قیلیشیچه، پاکستانلیک جنگریلر، جملهدن «پاکستان طالبان حرکتی» (تیتیپی) افغانستانده باشپناه تاپگن و او یېردن پاکستانگه قرشی حرکتلر اویوشتیرماقده.
پاکستان رسميلری بیر نېچه بار طالباننی بو گروهلرگه، جملهدن تیتیپیگه قرشی چاره کۉریشگه چقیرگن، اما طالبان افغانستانده خارجي جنگریلر موجودلیگینی رد اېتیب کېلماقده.
