روسيه فدرال خوفسیزلیک خدمتی باشلیغی الکساندر بورتنیکوف، «داعش-خراسان» گروهی، اونگه علاقهدار جهادي تشکیلاتلر و طالباننینگ قوراللی مخالفلری بریتانیا استخبارات خدمتلرینینگ فعال کۉمهگی بیلن طالبان حکومتینی ضعیفلشتیریش و افغانستاننینگ اَیریم حدودلرینی نظارتگه آلیشگه اورینهیاتگنینی ایتدی.
تاس خبرگزارلیگی گزارشیگه کۉره، روسيهلیک یوقاری مرتبهلی عملدار مستقل دولتلر همدۉستلیگی خوفسیزلیک و مخصوص خدمتلری کېنگشی ییغیلیشیده بو گروهلر اینیقسه افغانستان شِمالیدهگی اَیریم حدودلرنی طالبان نظارتیدن چیقریشگه حرکت قیلهیاتگنینی بیلدیرگن.
روسيه فدرال خوفسیزلیک خدمتی باشلیغی، «غرب دولتلری اوشبو منطقهگه (افغانستان شِمالیگه) تهیهنگن حالده کېینچهلیک مرکزي آسیا جمهوریتلریدهگی وضعیتگه اۉز منفعتلری یۉلیده تأثیر کۉرسهتیشگه امید قیلماقده دېگن.»
او شونینگدېک، «داعش-خراسان» تاجیکستان، اۉزبېکستان، قیرغیزستان و قازاقستان فقرالری همده روسيهدهگی مهاجر ایشچیلر آرهسیدن فعال روشده جنگریلر یالهیاتگنینی ایتگن.
الکساندر بورتنیکوف طالبان بیلن تروریزمگه قرشی همکارلیکنی رواجلنتیریش مهملیگینی تأکیدلب، شوندهی دېدی:
«بیز هم اۉز تامانیمیزدن بوندهی همکارلیکنی عملگه آشیرماقدهمیز. جملهدن، افغانستانده سیاسي برقرارلیکنی قۉللب-قوّتلش و کابل همده اسلام آباد اۉرتهسیدهگی مناسبتلرنی نارمهللشتیریش بۉییچه کېنگراق سعی-حرکتلر دایرهسیده هم. بیزنینگ عمومي خوفسیزلیگیمیز بېواسطه افغانستان و پاکستان منطقهسیدهگی تینچلیککه باغلیق بۉلهدی.»
بو ادعالر طالبان افغانستانده داعش موجودلیگینی انکار قیلیب، اونی مملکتده یۉق قیلگنینی دعوا قیلهیاتگن بیر پیتده ینگرهماقده.
طالبان رسميلری، شونینگدېک، قوراللی مخالفت کوچلرینینگ افغانستان حدودیده موجودلیگینی هم تصدیقلهمهیدی و مخالف جبههلر تامانیدن دعوا قیلینهیاتگن هجوملرنی رد اېتهدی یاکه اولر حقیده ایضاح بېرمهیدی.
