طالبلر ایچکی ایشلر وزیرلیگی مملکت یشاوچیلریدن قربان هییت کونلریده «پتاقی» و یانغین چیقرووچی مادّهلرنی ایشلتمسلیکنی سۉرهدی.
ایچکی ایشلر وزیرلیگی سۉزلاوچیسی عبدالمتین قانع بوگون (دوشنبه ۴ جوزا) نشر قیلگن ویدیوده بو واسطهلردن فایدهلنیش «آدملرگه ناقولهیلیک توغدیریشی، کۉنگیلسیز حادثهلر، جسماني جراحتلر و جماعت ترتیبینینگ بوزیلیشیگه سبب بۉلیشی»نی ایتدی.
طالبلر ایچکی ایشلر وزیرلیگی سۉزلاوچیسی قاعدهنی بوزگنلرگه نسبتاً «قانوني چارهلر» کۉریلیشی حقیده آگاهلنتیردی.
افغانستان شهرلریده، اینیقسه کېچکی پیتلر و بیرم مراسملریده «پتاقی» همده تورلی پارتلاوچی و یانغینلی واسطهلردن فایدهلنیش اوزاق ییللردن بېری یشاوچیلرنینگ شکایتلریگه سبب بۉلیب کېلماقده. بیراق طالبلرنینگ تکراري آگاهلنتیریشلریگه قرهمهی، بو حالتنی تۉلیق تۉختهتیش حاضرچه موفق بۉلمهگن.
شونینگدېک، وزیرلیک سۉزلاوچیسی قربان هییت کونلری امنیتنی تأمینلش اوچون مخصوص چارهلر کۉریلگنینی ایتدی.
اونینگ سۉزلریگه کۉره، طالبان پولیس کوچلرینی ترافیک یۉللری، گوجوم حدودلر، بازارلر، مسجدلر و باغلرده خوفسیزلیکنی تأمینلش اوچون جایلشتیریلهدی.
طالبلر عالی محکمهسی اېسه شو هفتهنینگ چهارشنبه کونینی قربان هییتی دېب اعلان قیلگن. شو مناسبت بیلن مملکت بۉیلب رسمي تعطیل اېرتهدن باشلهنیب، کېلهسی هفته شنبهگچه دوام اېتهدی.
