ایران تشقی ایشلر وزیرلیگی سۉزلاوچیسی اسماعیل بقایی، ایران طالبلر و پاکستان حکومتی اۉرتهسیدهگی کېسکینلیکنی کمهیتیریش اوچون هېچ قندهی سعی-حرکتنی ایهمهمسلیگینی، بیراق حاضرده اساسي اعتبار امریکا بیلن اوروشنی توگهتیشگه قرهتیلگنینی ایتدی.
او بوگون (دوشنبه،۴ جوزا) ژورنالیستلر نینگ، پاکستان اوردوسی قوماندانی و ایچکی ایشلر وزیرینینگ تهرانگه سفری دوامیده ایراننینگ طالبان و پاکستان اۉرتهسیدهگی واسطهچیلیک مسألهسی هم محاکمه قیلینگن-قیلینمهگنی حقیدهگی سوالیگه جواب بېرر اېکن، شوندهی دېدی: «بیز حاضرگی باسقیچده منطقهدهگی اوروشنی توگهتیشگه اعتبار قرهتگنمیز.»
اونینگ قۉشیمچه قیلیشیچه، «قۉشنی دولتلر اۉرتهسیدهگی کېسکینلیک مسألهسی بیز اوچون البته مهم. افغانستان و پاکستان اۉرتهسیدهگی تنگلیک دولت باشقرووینینگ برچه درجهلریده بیزنی تشویشگه سالهدی.»
بقایینینگ ایتیشیچه، ایران بیر نېچه بار افغانستان و پاکستان اۉرتهسیدهگی کېسکینلیک همده دشمنلیکنی کمهیتیریشگه قرهتیلگن هر قندهی تشبثنی قۉللب-قوّتلشگه تیار اېکنینی بیلدیرگن.
طالبلر و پاکستان اۉرتهسیدهگی تۉقنهشوولر تخمیناً اوچ آیلیک دواميلیکدن سۉنگ، چېگره ایکّی تامانیدهگی قبیله آقسقاللری واسطهچیلیگیده حاضرچه تۉختهتیلگن. اما تامانلر حلی اوروشنی یکونلش، چېگرهلرنی قَیته آچیش و سودا-سیاسي علاقهلرنی نارمهللشتیریش بۉییچه یکوني کېلیشووگه اېریشه آلمهگن.
سۉنگّی آیلرده تورکیه، قطر، سعودیه عربستان و چین کبی دولتلر هم ایکّی تامان اۉرتهسیدهگی کېسکینلیکنی یومشهتیشگه حرکت قیلماقده. ایران هم بو بارهده واسطهچیلیک قیلیشگه تیارلیگینی بیلدیرگن، بیراق بو سعی-حرکتلر حاضرچه دایمي صلح و رسمي کېلیشووگه آلیب کېلمهگن.
