اطلاعات روز اختیاریگه قۉییلگن حجتده طالبلرنینگ خصوصي بیلیم یورتلری محصللری هم حنفی مذهبیگه عمل قیلیش حقیده مجبوري تعهدنامهنی امضالشگه مجبور قیلهیاتگنی حقیده حجتلر آشکار بۉلدی.
قۉلگه کیریتیلگن تعهدنامه نسخهلریدن بیری میهن بیلیم یورتیگه تېگیشلی بۉلیب، او کابلدهگی خصوصي بیلیم یورتلریدن بیری دیر.
مذکور حجتنینگ آلتینچی بندیده محصللر دیني مذهب مسألهسیده مجبوري بیانات بېریشی کېرهکلیگی قید اېتیلگن. بندده شوندهی دېییلهدی:
«افغانستان خلقی اهل سنت و جماعت صفیده بۉلیب، امام اعظم ابو حنیفه مذهبیگه اېرگشگنی سببلی، مېن هم بیرلیک و همجهتلیکنی سقلش مقصدیده عیناً شو مذهبگه اېرگشیشنی تنلهیمن.»
ینگی اۉقوو ییلی باشلنیشی بیلن مملکتنینگ تورلی ولایتلریدهگی دولت بیلیم یورتلری، جملهدن کتّه بحث-مناظرهلرگه سبب بۉلگن هرات بیلیم یورتی هم محصللردن بیر تمانلمه تعهدنامه امضالشنی طلب قیلگن اېدی.
اوشبو حجتگه کۉره، محصللر اۉزلرینینگ اوّلگی دیني و مذهبي اعتقادلریدن واز کېچیب، «حنفی مذهبی»گه عمل قیلیشگه مجبور اېتیلهدی.
بوندن تشقری، محصللر شخصي حیاتینینگ باشقه جهتلریده هم طالبان «شرعي قاعدهلر» و «اسلامي کۉرسهتمهلر» دېب اتهیاتگن معیارلرگه رعایه قیلیشگه مجبور بۉلماقده.
تعهدنامهلرده محصللر «ساچلرینی شریعتگه ضد طرزده آلدیرمسلیک»، بیلیم یورتی حدودیده «نامحرم» بیلن یورمسلیک و «موسیقی تینگلشدن» تيیلیش حقیده هم وعده بېریشلری کېرهکلیگی یازیلگن.
شونینگدېک، امضالش و برماق ایزی قۉییش «مجبوري» بۉلگن اوشبو حجتده محصللر طالبان نینگ «اسلامي امیرلیگی»نی «شرعي توزوم» دېب تن آلیشلری و «اونگه اطاعت قیلیش مېن اوچون واجب دیر، باشقه هېچ قندهی سیاسي گروه یاکه آقیم بیلن علاقهده بۉلمهیمن» دېب اعتراف اېتیشلری طلب قیلینهدی.
حالبوکه، مملکت بیلیم یورتلریدهگی کۉپلب محصللر و استاذلر شیعه اسلام طرفدارلری همده اهلی سنننینگ باشقه مذهبلریگه منسوب دیرلر.
طالبان افغانستاننی قَیته اېگهلهگنیدن بېری حنفی مذهبینی یگانه رسمي مذهب صفتیده اعلان قیلیب، شیعه مذهبی نینگ رسمي مقامینی بېکار قیلگن.
بو گروه رسميلری بیر نېچه بار اهالی نینگ فقط حنفی مذهبیگه عمل قیلیشی کېرهکلیگینی تأکیدلب کېلگن و باشقه مذهبلر، جملهدن شیعهلرنینگ دیني اېرکینلیکلریگه تورلی چېکلاولر قۉیگن.
شونینگدېک، طالبان سیاسي حزبلرنی بېکار قیلیب، اۉز توزیلمهسیدن تشقریدهگی سیاسي فعالیتنی ناقانوني دېب اعلان قیلگن.
