اروپا کمیسیونی باشلیغی اورزولا فون در لاین ایران و امریکا اۉرتهسیدهگی مذاکرهلرنینگ کېلیشوو سری سیلجیشینی آلقیشلهدی.
او بوگون (یکشنبه،۳جوزا) ایکس اجتماعی ترماغیده یازگن پیامیده شوندهی دېدی: «بیز حقیقي طرزده ضدیتلرنی کمهیتیرهدیگن، هرمز بۉغازینی قَیته آچهدیگن و تۉلیق نویگتسیه اېرکینلیگینی تأمینلهیدیگن کېلیشووگه محتاجمیز.»
کمیسیون باشلیغی شونینگدېک، ایران «هسته قورالینی رواجلنتیریشگه یۉل قۉییلمسلیگی کېرهک»لیگینی تأکیدلهدی.
اونینگ قۉشیمچه قیلیشیچه، ایران «منطقهدهگی بېقرارلشتیرووچی حرکتلریگه، بېواسطه یاکه پراکسی کوچلر آرقهلی عملگه آشیریلهیاتگن فعالیتلریگه همده قۉشنی دولتلرگه قرشی اساسسیز و تکراري هجوملریگه» چېک قۉییشی کېرهک.
اورزولا فون در لاین اروپا همکارلری بیلن بیرگه دیپلوماتیک یېچیم اوچون اوشبو امکانیتدن فایدهلنیشنی دوام اېتتیریشینی ایتیب، بو کېلیشوو گلوبل تأمینات زنجیری و انرژی نرخلریگه تأثیر قیلیشی ممکن بۉلگن کېسکینلیک نینگ کېنگهییب کېتیشینی آلدینی آلیشگه قرهتیلگنینی قۉشیمچه قیلدی.
امریکا جمهور رییسی دونالد ترامپ هم منطقهدهگی اتفاقچیلری بیلن مذاکرهلردن سۉنگ کېلیشوو یکوني باسقیچگه یېتگنینی و هرمز بۉغازی آچیلیشی ممکنلیگینی بیلدیرگن.
امریکا تشقی ایشلر وزیری مارکو روبیو هم یقین ساعتلرده ایران بیلن کېلیشوو بۉییچه «یخشی ینگیلیکلر» اعلان قیلینیشی احتمالی بارلیگینی ایتگن.
ایران رسميلری اېسه امریکا تامانی طرفیدن بیلدیریلهیاتگن بو بیاناتلرگه حاضرچه ایضاح بېرمهگن.
