طالبلر رهبری هبتالله آخوندزاده، قربان هییتی مناسبتی بیلن یۉلهگن پیامیده افغانستانده اسلامي توزوم حکمرانلیگی آستیده خلق حقلری تأمینلنگن و حمایهلنگنینی، «ظلم و تجاوز» موجود اېمسلیگینی ادعا قیلدی.
آخوندزاده نینگ بوگون (یکشنبه، ۳جوزا) نشر قیلینگن پیامیده شوندهی دېییلهدی: «اسلامي توزوم حکمرانلیگی بیلن برچه یشاوچیلرنینگ شرعي حقلری تأمینلنگن و حمایهلنگن دیر، هېچ کیم باشقهسیگه ظلم و تجاوز قیله آلمهیدی، ظلمنینگ آلدی آلینهدی و مظلوم نینگ حققی طلب قیلینهدی».
فقط اېرککلرگه، «حرمتلی افغان برادرلر»گه خطاب قیلینگن اوشبو پیامده ملا هبتالله خلقدن طالباننینگ «اسلامي توزومی سایهسیده» یشهیاتگنی اوچون الله گه شکر قیلیشنی سۉرهگن.
آخوندزاده طالبان محکمهلری فعالیتی آرقهلی «اسلام شریعتی» تطبیق اېتیلگنینی و امر به معروف کوچلرینینگ «جمعیتنی اصلاح قیلیش» بارهسیدهگی سعی-حرکتلری دوام اېتهیاتگنینی ایتگن.
او طالبلر اعضالرینی «ظلمدن اوزاق بۉلیش»گه چقیریب، ظالم قنچهلیک قدرتلی بۉلمهسین، بری بیر خار بۉلیشینی تأکیدلهگن.
آخوندزاده طالبان نینگ خوفسیزلیک ادارهلریگه هییت کونلریده «خلقنینگ آسایشتهلیگی، خدمتی و خوفسیزلیگی»گه تۉلیق اعتبار قرهتیش همده اولرنینگ «خورسندچیلیگی و آسایشتهلیگی» اوچون برچه ضرور چارهلرنی کۉریشنی تاپشیرگن.
بو حالت سۉنگّی قریب بېش ییل دوامیده هییت کونلریده طالبان قوراللی کوچلری و امربه معروف خادملری مملکت بۉیلب آدملرنی تعقیب قیلگنی، حتا کلتکلهگنی و حبسگه آلگنی حقیدهگی کۉپلب حالتلر یانیده یوز بېرماقده.
کۉپلب حالتلرده هییت و ینگی ییل کونلریده طالبان عایلهلر نینگ دَم آلیش مسکنلریگه باریشیگه تۉسقینلیک قیلگن، عیال و قیزلرنی کییملری سببلی تعقیب قیلگن همده یاشلرنی قۉشیق ایتیش یاکه محلي اۉیینلر کبی قووانچ دستورلرینی اۉتکزگنی اوچون کلتکلب، حبسگه آلگن.
