بیرلشگن ملتلر تشکیلاتینینگ ینگی گزارشیده۲۰۲۶ ییلنینگ دستلبکی اوچ آییده منطقه دولتلریدن۵۰۰ مینگدن آرتیق مهاجر افغانستانگه قَیتریلگنینی و ییل آخریگچه ینه۲.۷میلیون کیشی دېپورت قیلینیشی ممکنلیگینی معلوم قیلدی.
بیرلشگن ملتلر تشکیلاتی بوگون (یکشنبه،۳جوزا) اعلان قیلگن گزارشیده اپرېل آییدن دسامبر آخریگچه ایراندن۱.۶میلیون، پاکستاندن اېسه ینه۱.۱میلیون مهاجر افغانستانگه چیقریب یوباریلیشی کوتیلهیاتگنینی بیلدیرگن.
مسوول تشکیلاتلر بو قدَر کۉپ قَیتگن مهاجرلرنینگ شاشیلینچ احتیاجلرینی قاندیریش و اولرنی جمعیتگه ماسلشتیریش اوچون۵۲۹.۲میلیون دالر مبلغ سۉرهگن.
بیرلشگن ملتلر تشکیلاتی بوندهی کېنگ کۉلملی قَیتیش افغانستان اوچون کتّه انسانی و رواجلنیش معماسینی یوزهگه کېلتیریشیدن آگاهلنتیرگن.
گزارشده ایتیلیشیچه،۲۰۲۳ ییل سپتامبردن۲۰۲۶ ییل اپریلگچه ایران و پاکستاندن جمعی۵.۸میلیون مهاجر افغانستانگه دېپورت قیلینگن.
بیرلشگن ملتلر تشکلاتیگه کۉره، بو مقداردهگی مهاجرلرنینگ قَیتیشی مملکت اهالیسی سانینی تخمیناً ۱۲.۱۰فایزگه آشیرگن.
فقط اۉتگن ییل نینگ اۉزیده ایران و پاکستان نینگ مهاجرلرگه نسبتاً سیاستی کوچهیگنی سببلی۲.۹میلیون مهاجر وطنگه قَیتگن یاکه دېپورت قیلینگن.
بیرلشگن ملتلر تشکلیاتی حساب-کتابلریگه کۉره، بو ییل افغانستانگه قَیتووچیلر سانی اۉتگن ییلگه قرهگنده کۉپراق بۉلیب،۳.۲میلیون کیشیگه یېتهدی.
تشکیلات اگېنتلیکلری و همکار تشکیلاتلر تیارلهگن حساباتده ایتیلیشیچه، قَیتگن مهاجرلر نینگ۵۰ فایزینی عیاللر و بالهلر تشکیل اېتهدی.
حساباتگه کۉره، مهاجرلر افغانستانگه قَیتگچ، باشپناه، ساغلیقنی سقلش و تعلیم خدمتلریدن فایدهلنیشده جدّي معمالرگه دوچ کېلماقده.
