انگلستان و ولز کرکت بوردی (ایاسبی)نینگ اعلان قیلیشیچه، «افغانستاننینگ سورگوندهگی عیاللر کرکت تیمی» اعضالری ۲۰آور اۉیینلرده اشتراک اېتیش اوچون انگلستانگه سفر قیلهدی.
ایاسبی بیاناتیگه کۉره، جماعهنینگ۲۰ نفر اعضاسی۲۲-جون کونی انگلستانگه یۉل آلهدی. بو جماعه اوچون بیرینچی رسمي خلقارا سفر بۉلهدی.
رېجهگه کۉره، اولر ۲۰-آور فورمتیدهگی اۉیینلرده قتنهشهدی و انگلستانده اۉتکزیلهدیگن خلق ارا۲۰ آور باسقیچلریده هم اشتراک اېتیشی ممکن.
شونینگدېک، مذکور تیم اسکاتلندنینگ ادینبرو شهریده بۉلیب اۉتهدیگن کرکت خلق ارا کېنگشی ییغیلیشی عرفهسیده هم قتنهشهدی.
۲۰۲۱-ییلده طالبان قَیته حاکمیتگه کېلگچ، افغانستاندهگی عیاللر کریکتی تیزیمی دېیرلی تۉلیق پرچهلنیب کېتگن اېدی. کېینچهلیک کۉپلب سپورتچیلر آسترلياگه باشپناه آلیب، ۲۰۲۵-ییل جنورییده «افغانستاننینگ سورگوندهگی عیاللر کرکت تیمی» نامی آستیده ملبورنده ایلک بار خلقارا اۉیینلرده میدانگه توشگن.
کېینراق کرکت خلق ارا کېنگشی سپورتچیلرنی قۉللب-قوّتلش اوچون مخصوص ایشچی گروه توزدی و انگلستان، آسترليا همده هندستان کرکت کېنگشلری بیلن همکارلیکده مالیوي یاردم جمغرمهسینی یۉلگه قۉیدی.
طالبان افغانستانده عیاللر سپورتینی منع قیلگن بیر پیتده، بو سپورتچیلر خلق ارا تشکیلاتلردن فیفا مۉدلیگه اۉخشش طرزده اۉزلرینی «افغانستان وکیلی» صفتیده تن آلیشنی سۉرهماقده.
بیر آی اوّل فیفا افغانستان عیاللر فوتبال جماعهسینی سورگونده رسمي وکیل صفتیده تن آلگن اېدی.
