«افغانستان ملی مقاومت جبههسی» رهبری احمد مسعود اروپا پارلمانینینگ ینگی قطعنامهسینی قۉللب-قوّتلب، اروپا اتفاقی طالبان بیلن علاقهلرنی کېنگهیتیریش اۉرنیگه افغانستان خلقی تامانیده توریشی کېرهکلیگینی ایتدی.
مسعود بوگون (شنبه، ۲جوزا) ایکس اجتماعی ترماغیدهگی بیاناتیده شوندهی دېدی: «بیز اروپالیک دۉستلریمیزدن افغانستان نینگ آزادلیکسېور خلقی یانیده توریشده دوام اېتیشلرینی سۉرهیمیز؛ اولرنی باستیرهیاتگن ترورچیلر و مستبدلر یانیده اېمس.»
مسعود اروپا پارلمانینینگ ینگی قطعنامهسینی قدرلهگن. اوشبو حجتده اروپا اتفاقیگه اعضا دولتلردن طالبان بیلن مناسبتلرنی «نارمللشتیرمسلیک» طلب قیلینگن.
«افغانستان ملی مقامت جبههسی»نینگ رهبری اروپا پارلمانی معاونی همده اعضاسی پینا پیچرنوگه «طالبان گروهینی نارمللشتیریشگه قرشی انیق موضعی» اوچون منّتدارلیک بیلدیرگن.
او ینه اروپا «انسان حقوقلری، دېموکراسی، انسان قدر-قیمتی و قانون اوستوارلیگی» کبی اوزاق ییللردن بېری حمایه قیلهیاتگن تمایللرگه صادق قالیشی کېرهکلیگینی تأکیدلهگن.
اروپا پارلمانی پنجشنبه کونی۳۱ -ثور افغانستاندهگی انسان حقوقلری وضعیتی بۉییچه قطعنامه قبول قیلیب، اروپا اتفاقیگه اعضا دولتلردن طالبان بیلن علاقهلرنی «نارمهللشتیرمسلیک»نی سۉرهدی.
قطعنامه ده اروپا پارلمانی اعضالر و اجرائیه انستیتوتلردن طالبانگه قرشی «ینهده قطعي چارهلر» کۉریشنی، جملهدن « خلق ارا کییفری محکمه حکملری بجریلیشی و طالبلر رهبرلریگه قرشی انسان حقلری تحریملری کېنگیتریلیشی» قۉله آلیشنی طلب قیلگن.
