اروپا اتفاقینینگ افغانستاندهگی نمایندهلیگی سرپرستی ورونیکا بوسکویچ پوهار بیر قطار همکارلری بیلن مملکت مرکزیدهگی باميان ولایتیگه سفر قیلگن.
اروپا اتفاقینینگ افغانستاندهگی نمایندهلیگی بوگون (جمعه، ۱-جوزا) ایکس اجتماعی پلاتفورمیده یازیشیچه، باميان اهالیسی اوشبو سفر دوامیده «تعلیم و آنهلر سلامتلیگی اوچون ضرور بۉلگن طبي خدمتلردن فایدهلنیشدهگی دوام اېتهیاتگن معمالرنی اۉرتاقلشگن.»
نمایندهلیکنینگ قۉشیمچه قیلیشیچه، اروپا اتفاقی جماعهسی جهان آزیق-طعام دستوری همده آغهخان ترقیات جمغرمهسی تامانیدن یۉلگه قۉییلگن سوو لایحهسینی هم کۉزدن کېچیرگن و اونینگ مینگلب آدملر حیاتینی یخشیلش، دهقانچیلیک، تورموش منبعلری همده آزیق-طعام خوفسیزلیگینی مستحکملشدهگی تأثیرینی کوزهتگن.
باميان ولایتی افغانستان نینگ اېنگ کم رواجلنگن و خدمتلردن اېنگ کۉپ محروم قالگن حدودلریدن بیری حسابلنهدی. اونینگ اهالیسی بیر نېچه بار اساسي خدمتلر، جملهدن تعلیم و ساغلیقنی سقلش خدمتلریگه یېترلی درجهده کیره آلمهیاتگنیدن شکایت قیلگن.
شونگه قرهمهی، طالبان قَیته حاکمیتنی اېگهلهگنیدن سۉنگ بو ولایتگه باسیملر کوچهیگن و اَیریم اهالی طالبان محکمهلری قرارلری اساسیده مجبوري کۉچیریلیشگه دوچ کېلگن.
