طالبلرنینگ معلوم قیلیشیچه، تیناوون (چهارشنبه، ۳۰ثور) دایکندی و قندهار ولایتلریده چقماق اوریشی عاقبتیده اوچ کیشی جان بېرگن.
طالبلرنینگ دایکندی والیسی مطبوعات ادارهسی ترقهتگن بیاناتگه کۉره، کېچ ساعت 6:30 لر اطرافیده میرامور اولسواللیگینینگ «رباط» حدودیدهگی «زیرات» قیشلاغیده۲۲ یاشلی ییگیتنی چقماق اوریب، او واقعه جاییده وفات اېتگن.
شونینگدیک طالبلرنینگ قندهاردهگی طبيعي آفتلرگه قرشی کورهش ادارهسی باشلیغی عبدالسلام عمیر میوند اولسواللیگیده هم چقماق اوریشی عاقبتیده ایکّی کیشی هلاک بۉلگنینی ایتدی.
تخمیناً۱۰ کون آلدین نوریستانده بیر عایلهگه چقماق توشیب، بیر عیال هلاک بۉلگن، بیر قیز و بیر اېرکک اېسه یرهلنگن اېدی. شونگه اۉخشش حادثهلرده ننگرهار ولایتیده هم ایکّی کیشی وفات اېتیب، ینه اوچ کیشی جراحت آلگن.
چقماق یاکه مامهقلدیراق اوریشی جوده کوچلی الکتر آقیمی سبب یوز بېرهدی. بعضاً اونینگ قوّتی میلیونلب ولتگچه یېتیشی ممکن. بو اېسه مییه و عصب تیزیمی نینگ ضررلنیشی، یورهک تۉختشی، نفس آلیش نینگ تۉختشی، آغیر کوییشلر و حتا اۉلیمگه آلیب کېلیشی ممکن.
خوفنی کمهیتیریش اوچون مامهقلدیراق و کوچلی یامغیر وقتیده درخت تگیده تورمسلیک، آچیق میدانلرده همده مېتال یاکه سوو یقینیده قالمسلیک، امکان قدَر بنا یاکه یاپیق جایده پناه تاپیش توصیه اېتیلهدی.
