محلي منبعلرنینگ ایتیشیچه، طالبلر لغمان ولایتینینگ علینگار اولسواللیگیده عشر تۉلهمهگنلیکده عیبلب کمیده آلتی دهقاننی حبسگه آلگن.
خوفسیزلیک معمالری سبب اسمی آشکار اېتیلیشینی ایستهمهگن منبعنینگ «اطلاعات روز»گه ایتیشیچه، بو دهقانلر چهارشنبه کونی (۳۰-ثور) علینگار اولسواللیگینینگ «کبیلی» منطقهسیده قۉلگه آلینگن.
مذکور منبعنینگ قۉشیمچه قیلیشیچه، «طالبان قیشلاقلرگه باریب، حتا یېییشگه نانی یۉق عایلهلردن هم مجبورن عشر و زکات ییغماقده.»
اونینگ سۉزلریگه کۉره، کېچه طالبان و دهقانلر اۉرتهسیده عشر ییغیش مسألهسیده تارتیشوو یوز بېرگچ، طالبان آلتی کیشینی حبسگه آلگن. چونکه اولر عشر مقداری بۉییچه بحثلشیب، اونی تۉلهشدن باش تارتگن اېدی.
منبع نینگ قۉشیمچه قیلیشیچه، حبسگه آلینگنلر 24 ساعت اۉتگنیگه قرهمهی هنوز طالبلر قماغیده سقلنماقده.
منطقهدهگی ینه بیر منبع هم، اسمی سِر قالیشی شرطی بیلن، خلق نینگ آغیر اقتصادي احوالیگه قرهمهی طالبلر عشرنی «مجبورن» ییغهیاتگنینی تصدیقلهدی.
طالبلر اېکینچیلیک ادارهسی حاصل مقدارینی حسابگه آلمسدن، هر بیر دهقان و یېر اېگهسیدن عمومي حاصل نینگ 10 فایزینی عشر صفتیده آلماقده.
درآمدی نینگ یگانه منبعی یېر محصولاتی بۉلگن دهقانلر اوچون عشر تۉلش جوده قیین. اما طالبان اونی دولت سالیغیدن تشقری «دیني سالیق» صفتیده همهدن «مجبورن» ییغماقده.
هر ایکّی منبع «اطلاعات روز»گه کۉپ حاللرده طالبان دهقانلردن حاصل نینگ اۉرنیگه اونینگ نقد پولدهگی قیمتینی تۉلهشنی طلب قیلهیاتگنینی ایتدی.
بونده اېسه محصولاتنی ساتیش امکانیتی یاکه بازاردهگی حقیقي نرخی حسابگه آلینمهیپتی.
