محلي منبعلر باميانده طالبلرنینگ استخبارات کوچلری ولایتدهگی بیرینچی خصوصي عامومی اخبارات واسطه بۉلگن «باميان رادیوسی» نینگ نشراتینی تۉختهتیب، ادارهسینی مُهرلب قۉیگنینی اَیتماقده.
منبعلرگه کۉره، طالبان استخباراتی یکشنبه کونی (۲۷-ثور) باميان شهری ینگی شهر حدودیدهگی «باميان رادیوسی» ادارهسیگه باستیریب کیریب، اونی مُهرلب قۉیگن.
بامياندهگی طالبان محلي مسووللری حاضرگچه اوشبو خصوصي یېتکرمه فعالیتی نیمه سببدن تۉختهتیلگنیگه ایضاح بېرمهگن.
«باميان رادیوسی» ۱۳۸۲-هجري شمسي ییلده ۸۹.۷ اف تۉلقینیده مملکت مرکزیدهگی باميان ولایتیده اۉز فعالیتینی باشلهگن اېدی. اوشبو رادیو باميان ولایتیده فعالیت باشلهگن بیرینچی خصوصي یېتکرمه حسابلنهدی.
بو رادیو اۉز تینگلاوچیلری اوچون تورلی خیل ینگیلیک، مدني، صنعت، اقتصادي و سیاسي دستورلر تیارلب نشراتگه اوزهتیب کېلگن همده طالبان افغانستانده قَیته حاکمیتنی اېگهلهگنیدن کېین هم فعالیتینی دوام اېتتیرگن اېدی.
طالبلر افغانستانده قَیته حاکمیتنی اېگهلهگنیدن بویان ژورنالیستلر و یېتکرمه فعالیتیگه کېنگ کۉلملی چېکلاولر جاري قیلگن.
بو گروه بیر نېچه بار یېتکرمه ادارهلریگه باستیریب کیریب، اولر نینگ فعالیتینی تۉختهتگن، ژورنالیستلر و مېدیا خادملرینی حبسگه آلیب، قماققه تشلهگن.
