کابلده طالبلر امنیه قوماندانلیگی «شعورگل پشتون» اسملی سابق حکومت جنرالی ایکّی عیالنی اۉلدیریشده عیبلنیب حبسگه آلینگنینی و او اۉز جنایتینی تن آلگنینی تصدیقلهدی.
طالباننینگ کابلدهگی امنیه قوماندانلیگی سۉزلاوچیسی خالد زدراننینگ معلوم قیلیشیچه، اوشبو سابق حربي منصبدار جمعه کونی (۲۵-ثور) کابل شهری نینگ اۉن یېتینچی-خوفسیزلیک حوزهسیده حبسگه آلینگن. اونینگ ایشی بۉییچه تېرگاو یکونلنگچ، حقوقي چارهلر کۉریش اوچون تېگیشلی ادارهلرگه تاپشیریلهدی.
اوّلراق محلي منبعلر «اطلاعات روز» گزیتهسیگه خبر بېریشیچه، طالبلر جنرال شعورگل پشتوننی کابلنینگ اۉن یېتینچی-حوزهسیده تاپیلگن ایکّی عیالنینگ قاتللیگی گمانی بیلن قۉلگه آلگن. اولر نینگ جسدلری عیناً شو حدوددن تاپیلگن اېدی.
جنرال شعورگل پشتون اوّلگی حکومت دوریده مدافعه وزیرلیگی اۉرینباسری همده۲۰۳ «تندر» قول اردو قوماندانی بۉلگن. او ۲۰۲۳-ییلده ینه بیر قنچه سابق حربي منصبدارلر بیلن بیرگه طالبان بیلن بیعت قیلگن اېدی.
محلي منبعلر اۉتگن پنجشنبه کونی «اطلاعات روز»گه کابل شهری اۉن یېتینچی-حوزهسیده ایکّی عیال نینگ قانلی جسدی تاپیلگنی حقیده خبر بېرگن. اولرنینگ جسدلری «مارشال فهیم یۉلی» اطرافیدهگی تېپهلیک یان بغریدن محلي اهالی تامانیدن تاپیلگن.
منبعلرگه کۉره، اۉلدیریلگن عیاللر۱۹ و۳۵ یاشلی آنه و قیز بۉلگن همده کابل نینگ غربي قِسمیدهگی دشت برچی حدودیده یشهگن.
منبعلر نینگ معلوماتیگه کۉره، گمانلنووچی کابل نینگ «پنجصد فامیلی» حدودیده تیکووچیلیک اوستاخانهسیگه اېگه بۉلگن. او آنهنی اوستاخانه نینگ یېرتۉلهسیده، قیزنی اېسه یوقاری قبتدهگی اویده اۉلدیرگن. حاضرچه اوشبو آنه و قیزنینگ اۉلدیریلیش سببی نامعلوم قالماقده.
