بیرلشگن ملتلر تشکیلاتی و اونینگ همکار نادولت تشکیلاتلری ایران همده پاکستاندن افغانستانگه قَیتهیاتگن مهاجرلرگه یاردم کۉرسهتیش اوچون ۲۰۲۶-ییل دوامیده۵۲۹میلیون دالرلیک رېجه ایشگه توشیردی.
افغانستانده بیرلشگن ملتلر تشکیلاتینینگ نمایندهلیگی (یوناما) نینگ معلوم قیلیشیچه، اوشبو رېجه بوگون (سهشنبه، ۲۹-ثور) کابلده دونر دولتلر نمایندهلری، بیرلشگن ملتلر تشکیلاتی ادارهلری، نادولت تشکیلاتلر و یېتکرمهلر اشتراکیده رسماً یۉلگه قۉییلدی.
یونامانینگ ایتیشیچه، بو رېجه افغانستانگه ۲۰۲۶-ییل اپریلیدن دسامبرگچه ایران و پاکستاندن قَیتیشی کوتیلهیاتگن تخمیناً۲.۷میلیون قَیتووچینی چېگرهدن کیریشیدن باشلب جمعیتگه قَیته قۉشیلیشیگچه قۉللب-قوّتلشگه قرهتیلگن کېنگ قمراولی استراتیژي دیر.
یوناما بیاناتیگه کۉره، جاري ییل دوامیده اېران و پاکستاندن۶۰۰ مینگ مهاجر افغانستانگه قَیتگن. یقین سکّیز آی ایچیده ینه۱.۷میلیون کیشی ایراندن و۱.۱میلیون کیشی پاکستاندن چیقریب یوباریلیشی همده افغانستانگه کیریب کېلیشی تخمین قیلینماقده.
بیرلشگن ملتلر تشکیلاتینینگ افغانستاندهگی انسان پرورلیک یاردمنی موافقلشتیریش بۉلیمی رهبری وظیفهسینی بجرووچی تاجالدین اویواله، مهاجرلرنینگ افغانستانگه قَیتیشی قیسقه مدتلی چېگره حادثهسی اېمسلیگینی، بلکه اوزاق مدتلی و چوقور دېموگرافیک همده رواجلنیش معماسی اېکنینی ایتدی.
او شوندهی دېدی: «قَیتهیاتگنلرنینگ یرمیدن کۉپی عیاللر و بالهلردیر. اولرنینگ کۉپچیلیگی افغانستاندن تشقریده توغیلیب، وایهگه یېتگن. اولر نینگ اصلی یشهگن حدودلری بیلن علاقهلری جوده ضعیف یاکه عموماً یۉق.»
اونینگ تأکیدلشیچه، یشش منبعلری، اوی-جای، تازه سوو، ساغلیقنی سقلش و حمایه تیزیملریگه تېزکار همده اۉرته مدتلی سرمایه کیریتیلمسه، بو انسانلر ینه کۉچیشگه، قشّاقلیک نینگ کوچهییشیگه و اجتماعي تنگلیکلرگه دوچ کېلهدی.
یوناما معلوماتیگه کۉره، ۲۰۲۶-ییلگی قَیتووچیلرنی قۉللب-قوّتلش رېجهسیده سۉرهلگن مبلغ نینگ۱۰۰.۷میلیون دالری چېگره حدودلریدهگی تېزکار یاردمگه اجرهتیلهدی. بو یاردم انترناتیانال اۉرگانیزهتیان فار میگرهتیان باشچیلیگیدهگی چېگره کانسارسیومی تامانیدن ساغلیقنی سقلش، آزیقلنتیریش، حمایه، ترانسپورت و نقد پول یاردمی شکلیده تقدیم اېتیلهدی.
یوناما ینه۴۲۸.۵میلیون دالر قَیتووچیلرنی قَیته انتیگراسیون قیلیش اوچون صرفلنیشینی بیلدیردی. اوشبو مبلغلر «مرکّب ضعیفلیک کۉرسهتکیچی» اساسیده اوستوار دېب تاپیلگن۳۵ تومنده، قَیتووچیلر زیچلیگی، قورغاقچیلیک درجهسی، آزیق-طعام خوفسیزلیگی و موجود ایچکی کۉچیش حالتلری انابتگه آلینگن حالده ایشلهتیلهدی.
بیاناتگه کۉره، بو یۉنهلیشدهگی یاردم تعلیم، ساغلیقنی سهقلش، سوو و سنیتاريه خدمتلرینی تیکلش، اقتصادي امکانیتلر یرهتیش، برقرار تیریکچیلیک منبعلرینی رواجلنتیریش همده اوی-جای و یېر حقوقلرینی کفالتلشگه قرهتیلهدی. برچه دستورلر حمایه، جندر تېنگلیگی و اجتماعي بیردملیک تمایللری اساسیده عملگه آشیریلهدی.
افغانستانده «ویژن انترنشنل» خلق ارا تشکیلاتی باشلیغی تامیندری دسیلوا، رېجه نینگ تقدیمات مراسمیده شوندهی دېدی: «احتیاجلر حجمی جوده کتّه، اما بیرلشگن ملتلر تشکیلاتی ادارهلری، نادولت تشکیلاتلر و همکارلریمیز نینگ عمومي امکانیتی هم خودّی شوندهی درجهده.»
اونینگ ایتیشیچه، فقط چېگره کانسرسیومی نینگ اۉزی۱۰۰.۷ میلیون امریکا دالریگه محتاج. بو مبلغ اېسه اېنگ ضعیف قَیتووچیلر نینگ اتیگی۴۰ فایزینی قمرهب آلهدی، حالبوکه قَیتووچیلر نینگ۷۰ فایزی ضعیفلیک مېزانلریگه ماس کېلهدی.
اونینگ قۉشیمچه قیلیشیچه، «چېگرهدهگی مالیوي تأمیناتدهگی بۉشلیقلر خوف-خطرلرنی کمهیتیریش و قَیتووچیلرنینگ برقرار قَیته انتیگراسیونسینی قۉللب-قوّتلش امکانیتیمیزگه بېواسطه تأثیر قیلهدی.»
بیرلشگن ملتلر تشکیلاتی و اونینگ همکارلری دونر دولتلردن ۲۰۲۶-ییلگی قَیتووچیلر رېجهسینی تۉلیق مالیهلشتیریشنی سۉردی. اولر نینگ ایتیشیچه، بو انسان پرورلیک و حمایه بحرانی نینگ ینه-ده چوقورلشیشی نینگ آلدینی آلیش همده میلیونلب افغانلر اوچون تیکلنیش و برقرار قَیته انتیگراسیون اساسینی یرهتیش اوچون ضروردیر.
بیرلشگن ملتلر تشکیلات حساباتیگه کۉره، ۲۰۲۳-ییل سپتامبریدن بویان تخمیناً۵.۹ میلیون مهاجر ایران و پاکستاندن افغانستانگه قَیتگن. اولرنینگ کۉپچیلیگی اوشبو ایکّی قۉشنی دولت تامانیدن مجبورن دېپورت قیلینگن.
مهاجرلرنینگ قَیتیشی افغانستاندهگی مهاجرت انقراضنی ینه-ده کوچهیتیردی و یاردمگه محتاج انسانلر سانینی آشیردی. بو اېسه افغانستان اوچون خلق ارا انسان پرورلیک مبلغلر کېسکین قیسقرهیاتگن بیر پیتده صادر بۉلماقده.
