طالبلر مسووللری و محلي منبعلر سمنگان ولایتیده مرکز همده فیروز نخچیر اولسوالیلگیده ایکّی کیشی اۉلدیریلگنینی معلوم قیلماقده.
سمنگاندهگی طالبان امنیه قوماندانلیگی مطبوعات سۉزلاوچیسی حشمتالله رحمانی بوگون (دوشنبه،۲۸ثور) «محمد اسرایل» اسملی ۲۷ یاشلی ییگیت نینگ جسدی آیبیک شهرینینگ «پشهخانه» حدودیدن تاپیلگنینی ایتگن.
اونینگ قۉشیمچه قیلیشیچه، محلي اهالی جسدنی باغ ایچیدن تاپگن و حاضرچه قاتللیک سببی همده تفصیلاتلری نامعلوم.
بیراق محلي منبعلر «اطلاعاتروز» گزیتهسیگه بو ییگیت کېچه «پاسو» روسوملی موتر بیلن یۉقالگنینی، بوگون اېسه اونینگ جسدی تاپیلگنینی بیلدیرگن.
شو بیلن بیرگه، محلي منبعلر فیروز نخچیر اولسواللیگیده بیر کېکسه اېرکک نامعلوم قوراللی شخصلر تامانیدن اۉلدیریلگنینی خبر قیلگن.
منبعلرگه کۉره، بو کیشی باغبان بۉلگن و قوراللنگن شخصلر اونی باغ ایچیده اۉلدیریب، اوندن «هنگ» اۉسیملیگی اوروغلریدن بیر مقدارینی آلیب کېتگن.
طالبان نینگ محلي مسووللری اوشبو قاتللیک حقیده حاضرچه ایضاح بېرمهگن.
طالبان افغانستانده حاکمیتنی قَیته اېگهلهگنیدن سۉنگ، مملکتنینگ تورلی حدودلریده قاتللیک حالتلری سېزیلرلی درجهده کۉپهیگن.
کۉپلب حالتلرده بو قاتللیکلر نینگ اجراچیلری «نامعلوم قوراللی شخصلر» دېب کۉرسهتیلهدی و طالبان اولرنینگ انیقلهنیشی همده جزالنیشی حقیده کمدن-کم معلومات بېرهدی.
