طالبلر تشقی ایشلر وزیرلیگی بیرلشگن عرب امیرلیکلریدهگی «براکه» اتم الکتر ستشنیگه اویوشتیریلگن درون هجومینی قارهلب، «منطقهدهگی زۉروانلیک کوچهییب بارهیاتگنیدن» خواطر بیلدیرگن.
طالبلر تشقی ایشلر وزیرلیگی مطبوعات سۉزلاوچیسی عبدالقهار بلخی بوگون (دوشنبه، 28 ثور) کېچقورون بیانات اعلان قیلیب، وزیرلیک «منطقهدهگی زۉروانلیکلرنینگ کوچهییشیدن چوقور خواطرده اېکنینی و شو مناسبت بیلن بیرلشگن عرب امیرلیگیدهگی ملکی تاسیساتلرگه، خصوصاً براکه اتم الکتر ستشنیگه قیلینگن سۉنگّی درون هجوملرینی قارهلشینی» بیلدیرگن.
اونینگ قۉشیمچه قیلیشیچه، طالبلر تشقی ایشلر وزیرلیگی «برچه ماجراگه علاقهدار تامانلرنی وزمینلیک و احتیاطکارلیککه رعایه قیلیشگه، خلق ارا تمایل و مجبوريتلرنی حرمت قیلیشگه همده زۉروانلیکنی ینه-ده کوچهیتیریشدن تيیلیشگه چقیرهدی، تاکه موجود ماجرالر ملاقات و تینچ یۉللر آرقهلی حل اېتیلسین».
ابوظبینینگ «الظفره» حدودیده جایلشگن «براکه» اتم الکتر ستشنی تیناوون درون هجومیگه اوچرهگن اېدی.
بیرلشگن عرب امیرلیگی مدافعه وزیرلیگینینگ معلوم قیلیشیچه، درونلردن بیری ستشننینگ ایچکی حدودیدن تشقریدهگی جنراتورگه اوریلیب، یانغین چیقیشیگه سبب بۉلگن.
وزیرلیککه کۉره، اوچته درون مملکتنینگ غربي چېگرهلری آرقهلی کیرگن بۉلیب، اولردن ایکّیتهسی اوریب توشیریلگن، اوچینچیسی اېسه الکتر ستشن جنراتوریگه کېلیب اوریلگن.
بیرلشگن عرب امیرلیگی مدافعه وزیرلیگی هجوم منبعسی حاضرچه انیقلنمهگنینی و بو بارهدهگی تېرگاو دوام اېتهیاتگنینی بیلدیرگن.
بیرلشگن عرب امیرلیگی تشقی ایشلر وزیرلیگی اېسه اوشبو هجومنی «اساسسیز ترورچیلیک حرکتی»، «کېسکینلیک نینگ خوفلی کوچهییشی، قبول قیلیب بۉلمهیدیگن تجاوزکار حرکت و خوفسیزلیککه تۉغریدن-تۉغری تهدید» همده خلقارا قانونلرنینگ آچیق بوزیلیشی دېب بهالهگن.
