طالبلر رهبری هبتالله آخوندزاده، پروان و کاپیسا ولایتلری دین علمالر کېنگشی اعضالری بیلن اوچرهشووده اولردن طالباننینگ اۉلدیریلگن جنگچیلری حقیده «کتابلر و رسالهلر» یازیشنی سۉرهدی. اونینگ ایتیشیچه، بو ایش هم «جهاد دوری تاریخینی» سقلشگه یاردم بېرهدی، هم اۉلدیریلگنلرگه«صداقت» حسابلنهدی.
طالبان سۉزلاوچیسی اۉرینباسری حمدالله فطرت بیانات ترقهتیب، اوچرهشوو بوگون (یکشنبه، ۲۷-ثور) پروان و کاپیسادهگی طالبان محلي مسووللری، گروه تشقی ایشلر وزیری امیرخان متقي همده بیر قطار دیني علمالر اشتراکیده بۉلیب اۉتگنینی معلوم قیلگن.
طالبان رهبری، شونینگدېک، گروه جنگچیلری نینگ قهیېرده و قچان هلاک بۉلگنینی قید اېتیشگه «علیحده اعتبار» قرهتیش کېرهکلیگینی ایتیب، کېلهجک اولادلر «مجاهدلر (طالبان) قربانلیکلری تاریخی بیلن تنیش بۉلیشلری» ضرورلیگینی تأکیدلهگن.
او ینه طالبان جنگچیلری قبرلری اوستیگه «لوحه» اۉرنهتیلیشی کېرهکلیگینی ایتیب، بو آرقهلی «اولر نینگ خاطرهسی و تاریخی ابدي قالیشینی» بیلدیرگن.
طالبلر افغانستاندهگی سۉنگّی ییگیرمه ییللیک اوروشینی «جهاد»، هلاک بۉلگن جنگچیلرینی اېسه «شهید» دېب اتهیدی و کتابلر همده باشقه مدني واسطهلر آرقهلی اوشبو اوروش حقیدهگی اۉز روایتینی مستحکملشگه اورینماقده.
شو مقصدده بو گروه حاضرگچه بیر نېچه «جهاد موزیمی» هم تشکیل اېتگن بۉلیب، اولرده «انتحاری واسکتلر» و یۉل چېتیدهگی پارتلشلرده ایشلهتیلگن «سریق بۉشکه» کبی اوروش واسطهلری نمایش اېتیلگن.
بیراق، طالبان کوچلری سۉنگّی ییگیرمه ییل دوامیده مینگلب افغانستان فقرالری، جملهدن عیاللر و بالهلرنینگ اۉلیمیده مسوول دېب حسابلنهدی. گروه رهبرلری اېسه «انسانیتگه قرشی جنایتلر» صادر اېتیشده عیبلنیب کېلماقده.
