تورک دنیاسینینگ بویوک شاعری و متفکری مختومقولی فراغی تولدینینگ نوبتدهگی ییللیگی مناسبتی بیلن استانبول شهریده کېنگ کۉلملی خاطره و مدني تدبیر بۉلیب اۉتدی.
تدبیر استانبولده فعالیت یوریتهیاتگن تورکمن جماعت تشکیلاتلری تشبثی بیلن تشکیل اېتیلدی. اونده تورکيه و افغانستانلیک شاعر و یازووچیلر، دولت مقاملری، سیاسي همده مدنی فعاللر، طلبهلر و تورک دنیاسی وکیللری اشتراک اېتدیلر.
تدبیرده سۉزگه چیققنلر مختومقولی فراغینینگ بیرلیک، برادرلیک و تېنگلیک غایهلری بوگونگی کونده هم کتّه اهمیتگه اېگه اېکنینی تأکیدلهدیلر. او تورک دنیاسی تفکریده بیرلیک و توران غایهلرینی ایلگری سورگن ایلک ییریک سیمالردن بیری اېکنی علیحده قید اېتیلدی.
شونینگدېک، مختومقولی ایجادی تورکي خلقلرنینگ عمومي مدني و معنوي ایلدیزلرینی مستحکملشده مهم اهمیتگه اېگه اېکنی اورغولندی.
اَیریم تورکمن مدني فعاللر اېسه اونینگ میراثی یاشلر اوچون معنوي یۉلچی یولدوز اېکنینی بیلدیریب، یاش اولادنی اونینگ اثرلرینی چوقور اۉرگنیشگه چقیردیلر.
تدبیر یکونیده تورکمن تیلی و ادبیاتی رواجیگه حصه قۉشگن بیر قطار فعاللرگه آلقیش نامه و فخري یارلیقلر تاپشیریلدی.
شونینگدېک، اشتراکچیلرگه تورکمن خلقی نینگ ملي عرف-عادتلری، کییم-کېچکلری کۉرگزمهسی نمایش اېتیلدی و تورکمن ملي موسیقهلریدن نمونهلر اجرا اېتیلدی.
