ولایتلر والیلری، امنیه قوماندانلری و طالبان نینگ شمالي زونگه قرهشلی ولایتلر استخبارات باشلیقلری سرپلده اۉتکزیلگن ییغیلیشده «باشقه دولتلردهگی گروهلرگه قۉشیلیب جهادگه چیقیشنینگ شرعي رخصتی یۉق» دېب اعلان قیلیشدی.
طالباننینگ بلخدهگی ولایت سۉزلاوچیسی عطاالله زایدنینگ ایتیشیچه، بو ییغیلیش تیناوون تونده (پنجشنبه، ۲۴-ثور) سرپل ولایتیده اۉتکزیلگن.
اونینگ سۉزلریگه کۉره، محلي طالبان عملدارلری بیر نېچه آی آلدین کابلدهگی علمالر ییغیلیشیده چیقریلگن فتواگه اشاره قیلیب، باشقه دولتلرده «جهاد»گه باریش و باشقه گروهلرگه قۉشیلیشنی رد اېتگن همده بوندهی حرکت «شرعي جهتدن جایز اېمس»لیگینی تأکیدلهگن.
طالبان و پاکستان اۉرتهسیدهگی حربي تۉقنهشوولر دوامیده شِمال و شِمالی-شرقدهگی بیر نېچه طالبانگه یقین ملالر پاکستانگه قرشی اوروش، او دولتنینگ غرب بیلن علاقهلری و غرب مدنیتینی ترغیب قیلیشی سببلی «جهاد» حسابلنهدی، دېگن فتوالر بېرگن اېدی.
عطاالله زایدنینگ ایتیشیچه، بو ییغیلیشده بلخ، سمنگان، جوزجان، سرپل و فاریاب ولایتلرینینگ حاکملری، خوفسیزلیک قوماندانلری و استخبارات باشلیقلری اشتراک اېتگن.
اونینگ قۉشیمچه قیلیشیچه، ییغیلیشنینگ اساسي مقصدی محلي ادارهلر اۉرتهسیده «موافقلشتیریشنی کوچهیتیریش» بۉلگن.
رسميلر «سابق جمهوریت قانونلرینی بېکار قیلیش و اسلام امیرلیگی قانونلرینی قۉللش، امیرلیککه قرشی سلبي ترغیباتنینگ آلدینی آلیش و قانون بوزووچیلرنی حربي محکمهگه تاپشیریش» مسألهلرینی هم بحث قیلگن.
شونینگدېک، «جنایتچیلیکنینگ آلدینی آلیش، شهرلردن تیلنچیلرنی ییغیب آلیش، کۉکنار اېکینلرینی و باشقه گیاهوند مادّهلرنی یۉق قیلیش» هم ییغیلیش موضوعلریدن بۉلگن.
طالباننینگ ولایت حاکملری، قوماندانلری و استخبارات باشلیقلری «عقیدهی اهلسنت والجماعت» ناملی کتابنی، طالبان رهبری هبتالله آخوندزاده تامانیدن یازیلگن اثرنی، برچه ادارهلرده اۉقیتیشگه قرار قیلیشدی.
