افغانستاننی قوتقریش اوچون ملی مقاومت عالی کېنگشی طالبان نینگ «مستبد سیاستلری»نی تنقید قیلیب، ایتیشیچه، هېچ بیر جمعیت عیاللرنی باستیریش و یاش اولادنی تعلیمدن محروم قیلیش آرقهلی فراوانلیک همده برقرارلیککه اېریشمهگن و اېریشه آلمهیدی.
قرشیلیک کېنگشی بوگون (جمعه، ۲۵-ثور) بیانات نشر قیلیب، عیاللر و قیزلرنینگ تعلیم آلیش حقوقینی «قطعي قۉللب-قوّتلش»نی بیلدیرگن همده تعلیمنی «ترقیات، عدالت، آنگ و برقرار تینچلیک نینگ پایدېواری» دېب اتهگن.
بیاناتده ایتیلیشیچه، «بوگون افغانستان خلقی، اینیقسه عیاللر و قیزلر، طالبان تامانیدن جمعیتگه یوکلهتیلگن کېنگ کۉلملی چېکلاو و محروميتلرگه دوچ کېلماقده. قیزلر اوچون مکتب و بیلیم یورتی اېشیکلرینینگ یاپیلیشی، عیاللرنینگ ایش و اجتماعي حیاتدن چېتلهتیلیشی، اساسي اېرکینلیکلرنینگ چېکلنیشی همده تعلیم و مدني مؤسسهلر نینگ ضعیفلشتیریلیشی انساني و فقرالیک حقوقلری نینگ آچیقدن-آچیق بوزیلیشی دیر.»
قرشیلیک کېنگشی طالباننی اوشبو وضعیت نینگ «بېواسطه مسوولی» دېب اتب، «بوندهی موستبد سیاستلرنینگ دوام اېتیشی افغانستاننی جهالت، قشّاقلیک، یکّهلنیش و چوقور اجتماعي بحران تامان سودرهب بارماقده»، دېب تأکیدلهگن.
اوشبو سیاسي ائتلاف عیاللر اوچون تعلیم و محنت اېشیکلرینی قَیته آچیش ضرورلیگینی تأکیدلب، «هېچ بیر جمعیت عیاللرنی باستیریش و یاش اولادنی تعلیمدن محروم قیلیش آرقهلی فراوانلیک و برقرارلیککه اېریشمهگن و اېریشه آلمهیدی»، دېگن.
بیاناتده ایش امکانیتلری نینگ کمهییشی، محنت خوفسیزلیگی نینگ یۉقلیگی و عیاللرنینگ اساسي حقوقلریگه بېپروالیک میلیونلب وطنداشلر حیاتیگه آغیر باسیم یوکلهیاتگنی قید اېتیلگن.
اعضالری افغانستاندن تشقریده یشهیاتگن ملي قرشیلیک کېنگشی علمالر، ضیالیلر، مدنی جماعهچیلیک تشکیلاتلری، ملي اربابلر، آزادلیک طرفدارلری و خلقارا همجمعیتنی عیاللر و قیزلرنینگ تعلیم آلیش حقوقینی قۉللب-قوّتلشده افغانستان خلقی یانیده توریشگه همده ظلم و محروميت قرشیسیده سکوت سقلهمسلیککه چقیرگن.
کېنگش «افغانستان کېلهجگی علم، آنگ، عدالت و برچه فقرالرنینگ تېنگ اشتراکی بیلن قوریلهدی» دېب تأکیدلب، هېچ قندهی کوچ علم و آزادلیک نورینی ابدي اۉچیره آلمهسلیگینی بیلدیرگن.
بو پیتده کېتمه-کېت بېشینچی ییل هم قیزلرسیز بیلیم یورتلریگه کیریش امتحان کانکور باشلنگن.
بیرلشگن ملتلر تشکیلاتینینگ افغانستاندهگی نمایندهلیگی یوناما ایکّی کون اوّلگی ینگی گزارشیده طالبان چېکلاولری سببلی 2،2 میلیون قیز مکتبگه باریش حقوقیدن محروم بۉلگنینی معلوم قیلگن.
