افغانستانده بیرلشگن ملتلر تشکیلاتینینگ نمایندهلیگی (یوناما) طالبلر تامانیدن اوچ خبرچینینگ «نامعلوم عیبلاولر» اساسیده حبسگه آلینگنیدن چوقور خواطر بیلدیرگن.
یوناما بوگون (پنجشنبه، ۲۴-حوت) ینه شونی معلوم قیلدیکی، «حاکمیتدهگی رسميلر (طالبان) تامانیدن تینتوو وقتیده خبرچیلرگه نسبتاً زۉروانلیک و اولرنینگ مال-ملکی مصادره قیلینگنی حقیدهگی خبرلر» هم تشویش اویغاتماقده.
بیرلشگن ملتلر تشکیلاتینینگ افغانستاندهگی ماموریتی اوشبو ژورنالیستلرگه قۉییلگن عیبلاولر و اولرنینگ حقوقي اساسلری حقیده آچیق معلومات بېریلیشینی، شونینگدېک، اولر اوچون عدالتلی محکمه جریانی و برچه حقوقلریگه رعایه اېتیلیشینی طلب قیلگن.
یوناما بیاناتیده: «اېرکین، مستقل و خوفسیز مطبوعات افغانستان جمعیتیده شفّافلیک، حسابدارلیک و ساغلام محیطنی تأمینلش اوچون ضروردیر»، دېییلهدی.
یوناما طالباننی «خلقارا انسان حقلری قانونلری بۉییچه مجبوريتلریگه رعایه قیلیشگه و ژورنالیستلر قۉرقوو، باسیم یاکه قصاص چارهلریسیز اۉز وظیفهلرینی بجریشیگه کفالت یرهتیشگه» چقیرگن.
طالبلر تخمیناً بیر هفته آلدی «پَیگرد» خبرگزارلیگی باشلیغی جاوید نیازی، همده طلوع نیوز خبرچیلری منصور نیازی و عمران دانش حبسگه آلگن اېدی.
طالبلر اخبارات و مدنیت وزیرلیگی اوشبو ژورنالیستلرنینگ حبسگه آلینگنینی تصدیقلهگن، بیراق بونگه سبب بۉلگن عامللر حقیده ایضاح بېرمهگن و فقط ایش «کۉریب چیقیلهیاتگنی»نی بیلدیرگن.
خبرچیلرنی حمایت قیلیش کمیته طلوع نیوز ژورنالیستلری حبسگه آلینگنی حقیدهگی خبر اعلان قیلینگچ، طالبان موبی گرووپ اوشبو تلویزیوننینگ باش کمپنیسیگه باستیریب کیرگنی و خادملرنی سۉراق قیلگنینی معلوم قیلگن.
طالبان حاکمیتگه قَیتگنیدن بېری ژورنالیستلر و عامهوي اخبارات واسطهلری فعالیتیگه کېنگ کۉلملی چېکلاولر جاري اېتگن. بو گروه بیر نېچه بار ژورنالیستلرنی حبسگه آلیب، قماققه تشلهگن همده اۉنلب یېتکرمه فعالیتی تۉختهتگن.
