افغانستانده بیرلشگن ملتلر تشکیلاتی نمایندهلیگی (یوناما)نینگ معلوماتیگه کۉره، مملکتنینگ باميان ولایتیده ناگرانلر اوچون «حقلر و شمولیت» موضوعیده سمینار تشکیل اېتیلگن.
یوناما بوگون (پنجشنبه، ۲۴-حوت) بېرگن بیاناتیده ایتیلیشیچه، اوشبو دستورده تخمیناً ۳۰ کیشی، جملهدن طالبلر محلي وکیللری همده مدنی جماعهچیلیک نمایندهیلری اشتراک اېتگن.
بیاناتگه کۉره، تدبیرده معلوللیگی بۉلگن شخصلر دوچ کېلهیاتگن اساسي معمالر محاکمه قیلینگن. اولر آرهسیده ایشسیزلیک، خدمتلرگه چېکلنگن کیریش، اجتماعي اشتراکدن چېتلهتیلیش و جمعیتده حقوقلر بۉییچه پست خبردارلیک کبی مسألهلر بار.
یوناما شونینگدېک، باميانده معلول عیاللر اوچون هم شونگه اۉخشش علیحده سمینار اۉتکزیلگنینی بیلدیرگن.
بامياندهگی یوناما منطقوي ادارهسی باشلیغی سارا دی مول معلوللر ارابهچهسیدهگی باسکېتبال جماعهسی بیلن هم اوچرهشیب، اولرنینگ فعالیتی، معمالری و امکانیتلری حقیده صحبتلشگن.
تشکیلات افغانستانده معلوللیگی بۉلگن شخصلرنینگ حقوقلری و جمعیت حیاتیده فعال اشتراکینی قۉللب-قوّتلشینی تأکیدلهگن.
ییللب دوام اېتگن اوروشلر نتیجهسیده افغانستانده یوز مینگلب آدملر معلوللیک بیلن یشهماقده. بیراق پست خبردارلیک و یېترلی یاردم یۉقلیگی سببلی اولر ایش، تعلیم و اجتماعي امکانیتلرگه اېریشیشده جدّي قیینچیلیکلرگه دوچ کېلماقده.
