طالبلر ایچکی ایشلر وزیرلیگینینگ خبریگه کۉره، بو گروه کوچلری کابلده اۉتکزیلگن مخصوص عملیات دوامیده آدم اۉغیرلشده گمان قیلینگن ایکّی شخصنی اۉلدیرگن و ینه بېش کیشینی حبسگه آلگن.
طالبلرنینگ ایچکی ایشلر وزیرلیگی سۉزلاوچیسی عبدالمتین قانعنینگ ایتیشیچه، عملیات تیناوون (چهارشنبه، ۲۳-حوت) کابلنینگ ۱۷-پولیس حوزهسیده عملگه آشیریلگن. اونینگ قۉشیمچه قیلیشیچه، عملیات دوامیده «سعید اشرف» اسملی بیر فقرا اۉغیرلب کېتووچیلردن آزاد اېتیلگن.
اونینگ بیاناتیده اۉلدیریلگن شخصلر «کریم الله» و «احمدی» اېکنی، اولر آدم اۉغیرلش بیلن شغللنووچی «تۉده باشلیقلری» بۉلگنی ایتیلگن. شونینگدېک، اولر «خدایداد باشچیلیگیدهگی گروهدن هم خوفلیراق» بۉلگن دېب تعریفلنگن.
خدایداد اېسه ایلگری افغانستانده مشهور آدم اۉغیرلاوچی صفتیده تنیلگن بۉلیب، ۲۰۱۴-ییلده اوّلگی حکومت تامانیدن قتل اېتیلگن اېدی.
طالبان ۲۰۲۱-ییلده قَیته حاکمیتگه کېلگنیدن بېری بیر نېچه بار جنایتچیلیککه قرشی عملیاتلر اۉتکزیب، آدم اۉغیرلش یاکه باشقه جنایتلرده گمان قیلینگن شخصلر اۉلدیریلگنینی معلوم قیلیب کېلهدی.
بیراق اَیریم محلي منبعلر و گواهلر بعضی حاللرده اۉلدیریلگن شخصلر جنایتگه علاقهدار بۉلمهگنینی و «بېگناه» آدملر هم قربان بۉلهیاتگنینی ادعا قیلیب کېلهدی.
