ناروی قاچقینلر کېنگشی باشلیغی یان اینگلند، تۉرت میلیوندن آرتیق افغانستانلیک مهاجرلر امریکا و اسرایلنینگ ایران بیلن اوروشی نینگ «اونوتیب قۉییلگن و اعتباردن چېتده قالگن قربانلری» اېکنینی ایتدی.
او بوگون (چهارشنبه،۲۳ثور) ایکس اجتماعی ترماقده یازیشیچه، ایرانده اوروش باشلنیشی بیلن کۉپلب افغانستانلیک مهاجرلر قوریلیش و باشقه نارهسمي ایشلردهگی ایش اۉرینلرینی یۉقاتگن.
یان اینگلند نینگ ایتیشیچه، درآمدلرنینگ کمهییشی و تورم نینگ آشیشی یانیده مهاجرلر اېندی عایلهلری اوچون آزیق-طعام خرید قیلیش یاکه اوی اجارهسینی تۉلهشگه قیینهلماقده.
ناروی قاچقینلر کېنگشی باشلیغی «آزیق-طعام نرخلری اۉتگن ییلگه نسبتاً دېیرلی ایکّی برابر آشدی دېدی. آدملر طعاملنیش وقتلرینی قیسقرتیریشگه، طبي دوالنیشنی کېچیکتیریشگه و قرضگه باتیشگه مجبور بۉلماقده. بولر نینگ برچهسی اوروش و کۉچکین دهشتی یانیده یوز بېرماقده.»
ناروی قاچقینلر کېنگشی باشلیغی اېراندهگی مینگلب مهاجر عایلهلرگه آزیق-طعام و اساسي احتیاجلرینی تأمینلش اوچون فوق العاده نقد یاردم کۉرسهتگنینی بیلدیرگن.
شونینگدېک، بالهلر، آته-آنهلر و اۉقیتووچیلر اوچون روحي قۉللب-قوّتلش خدمتلری تشکیل اېتیلگنی، اوروشدن ضرر کۉرگن مکتبلر ترمیملنگنی و بالهلر تعلیمنی دوام اېتتیریشی اوچون خوفسیز جایلر یرهتیلگنی ایتیلگن.
یان اینگلند نینگ تأکیدلشیچه، بحران چوقورلشیب بارهیاتگن بیر پیتده احتیاجلر کېسکین آرتگن، بیراق تشکیلات حاضرچه ینه مینگته عایلهگه یاردم بېریش اوچون مبلغگه اېگه خلاص.
اونینگ آگاهلنتیریشیچه، اگر قۉشیمچه مبلغ تاپیلمهسه، تشکیلات نینگ فوق العاده یاردم دستوری بیر آی ایچیده تۉلیق مالیوي تنقیصلیککه دوچ کېلهدی و کۉپلب محتاج انسانلر هېچ قندهی یاردم آلالمهیدی.
اېراندهگی کۉپلب افغانستانلیک مهاجرلر قوریلیش و باشقه آغیر ایشلرده کونلیک ایشچی صفتیده فعالیت یوریتهدی. اما اوروش باشلنیشی و قوریلیش ایشلری همده باشقه اَیریم ساحهلر نینگ تۉختشی عاقبتیده اولر جدّي اقتصادي معمالرگه دوچ کېلگن.
امریکا و اسرایلنینگ ایران بیلن اوروشی افغانستانلیک مهاجرلر آرهسیده هم قربانلرگه سبب بۉلگن.
ایران عاموی اخبارات واسطهلری خبریگه کۉره، امریکا و اسرایل هجوملری عاقبتیده بیر عایلهنینگ اعضالری هم داخل بۉلگن اۉندن آرتیق افغانستان فقراسی هلاک بۉلگن.
