افغانستانده بیرلشگن ملتلر تشکیلاتینینگ نمایندهلیک ادارهسی (یوناما) نینگ معلوم قیلیشیچه، جاريییل نینگ ۱-جنوریسیدن ۳۱-مارچگچه افغانستان و پاکستان چېگرهسی بۉیلب طالبان کوچلری همده پاکستان اۉرتهسیدهگی قوراللی تۉقنهشوولر عاقبتیده۳۷۲نفر تینچ اهالی هلاک بۉلگن، ینه۳۹۷ کیشی یرهلنگن.
یونامانینگ انسان حقوقلری بۉلیمی بوگون (سهشنبه، ۲۲-ثور) نشر قیلگن گزارشیده ایتیشیچه، قربانلرنینگ۲۶۹ نفری پاکستاننینگ کابلدهگی «امید» گیاهوندلیکدن دوالش مرکزیگه اویوشتیرگن هوا هجومی عاقبتیده هلاک بۉلگن. ینه۱۲۲کیشی، جملهدن بیر عیال جراحتلنگن بۉلیب، اولرنینگ اکثریتی دوالنهیاتگن بېمارلر بۉلگن.
یوناما معلوماتیگه کۉره، شفاخانه اوچته هوا هجومیگه اوچرهگن. بیرینچی هجوم مسجد و یاتاقخانهلرگه تېگگن. ایکّینچی هجوم کانتنیرلردن عبارت آزیق-طعام انباری همده یاتاقخانهنینگ بیر قِسمینی نشانگه آلگن. اوچینچی هجوم اېسه شفاخانه نینگ اساسن یاغاچدن قوریلگن کسب-هنر تعلیمی بۉلیمیدهگی بنالرنی اوریب، یانغین کېلیب چیقیشیگه سبب بۉلگن.
شونینگدیک یوناما مستقل روشده اوشبو هجومده۲۶۹ کیشی هلاک بۉلگنی و۱۲۲کیشی یرهلنگنینی تصدیقلهگنینی، بیراق «حقیقي رقم انچه یوقاری بۉلیشی ممکن»لیگینی بیلدیرگن.
طالبان اېسه پاکستاننینگ «امید» مرکزیگه اویوشتیرگن هوا هجومی عاقبتیده۴۰۰ کیشی هلاک بۉلگنی و۲۵۰ کیشی یرهلنگنینی معلوم قیلگن اېدی.
کابلدهگی گیاهوند مادهلرگه بېریلگنلرنی دوالش امید مرکزی اۉتگن قویاش هجري ییلی نینگ 27-حوت کونی هوا هجومیگه اوچرهگن. طالبان بو مرکزنی پاکستان نشانگه آلگنینی بیلدیرگن، بیراق پاکستان رسميلری مرکزگه هجوم قیلگنینی رد اېتیب، «ترورچیلر تاسیساتی و زیر ساختلری» نشانگه آلینگنینی ایتگن.
