جاپاننینگ کابلدهگی اېلچیخانهسی افغانستان محصللری اوچون ۲۰۲۷-ییلگی ماسترلیک و علمي-تدقیقات باسقیچی بۉییچه بورسیه دستوریگه عریضهلر قبول قیلیش جریانی باشلنگنینی اعلان قیلدی.
اېلچیخانه بوگون (دوشنبه، ۲۱ثور) ترقهتگن بیاناتیده اوشبو بورسیهلر جاپان تعلیم، مدنیت، سپورت، فن و تکنالوژيلر وزیرلیگی (Mext) تامانیدن افغانستانلیک محصللر اوچون اجرهتیلیشینی و عریضهلرنی تاپشیریش مدتی جاري آی نینگ ۲۵-تاریخیگچه اېکنینی معلوم قیلدی.
جاپان اېلچیخانهسی «بنیاد آقاخان» عریضهلرنی ییغیش و یازمه امتحان جریانینی یېنگیللشتیریشده یاردم بېرهیاتگنینی، بیراق نامزادلرنی تنلش بۉییچه هېچ قندهی مسوولیتگه اېگه اېمسلیگینی بیلدیردی. اېلچیخانه برچه حجتلرنی کۉریب چیقیش و طلبگارلرنی سرهلش جریانلری اوچون مستقل روشده جوابگر اېکنینی تأکیدلهدی.
اېلچیخانه بیاناتیگه کۉره، نامزادلرنینگ حجتلری کۉریب چیقیلگندن سۉنگ یازمه امتحان ۱۸-جون کونی، صحبت اېسه جولای آییده کابلده اۉتکزیلهدی.
جاپان اېلچیخانهسی عریضهلر بېپول طرزده الکترون پُسته آرقهلی یوباریلیشینی، بورسیهلر تۉلیق مالیهلشتیریلیشینی و اوچینچی تامان تامانیدن مالیوي یاردم طلب قیلینیشی احتمالي فریبگرلیک بۉلیشی ممکنلیگینی علیحده قید اېتدی.
جاپان اوّلگی ییللرده هم افغانستانلیک طلبهلر اوچون شونگه اۉخشش بورسیهلر اجرهتگن، بیراق اوشبو بورسیهلر سانینی هېچ قچان اۉز بیاناتلریده انیق کۉرسهتمهگن.
