پاکستان تشقی ایشلر وزیرلیگی خیبرپختونخوا ایالتیده نینگ بنو اولسواللیگیده جایلشگن پولیس پُستهسیگه اویوشتیریلگن هجوم آرتیدن طالباننینگ اسلام آباددهگی اېلچیخانهسی کارداری سرداراحمد شکیبنی چقیریب، کېسکین اعتراضینی بیلدیردی.
وزیرلیک دوشنبه کونی (21-ثور) ترقهتگن بیاناتده، هجوم یوزهسیدن آلیب باریلگن تېرگاو، تۉپلنگن دلیللر و تخنیکي معلوماتلر اوشبو هجوم افغانستاندن باشقریلگنینی کۉرسهتیشینی بیلدیردی.
معلوماتلرگه کۉره، فتحخیل ناملی پولیس پُستهسی شنبه آقشامیده خودکوش و قوراللی هجومگه اوچرهگن. هجوم عاقبتیده کمیده 15 نفر پولیس هلاک بۉلگن، ینه تۉرت کیشی، جملهدن بیر تینچ آدم یرهلنگن.
پاکستان تامانی هجوم اوچون جوابگرلیکنی «فتنهی خوارج»دېب اتلهیاتگن گروه ذمّهسیگه یوکلهدی. بو اتَمه پاکستان حکومتی تامانیدن تحریک طالبان پاکستانگه نسبتاً قۉللنهدی.
بیاناتده پاکستان افغانستان توپراغیدن اۉزیگه قرشی ترورچیلیک فعالیتلری دوام اېتهیاتگنیدن جدّي خواطر بیلدیرگن و بوندهی هجوم تشکیلاتچیلریگه قرشی قطعي چارهلر کۉریش حقوقینی سقلب قالیشینی تأکیدلهگن.
شونینگدېک، پاکستان تشقی ایشلر وزیرلیگی افغانستانده تورلی ترورچی گروهلرنینگ موجودلیگی و اولرنینگ فعالیتی اوچون شرایط یرهتیلگنی بیرلشگن ملتلر تشکیلاتینینگ کوزهتوو حساباتلری همده باشقه خلقارا منبعلرده قید اېتیلگنینی بیلدیرگن. وزیرلیک تروریزمگه قرشی کورهش عمومي مسوولیت اېکنینی اېسلهتیب، طالباننی افغانستان حدودیدن باشقه دولتلرگه قرشی فایدهلنیلیشیگه یۉل قۉیمسلیک حقیدهگی وعدهسیگه عمل قیلیشگه چقیرگن.
پاکستان تامانی طالبان حکومتیدن بیر نېچه بار تحریک طالبان پاکستان، «فتنهی خوارج» همده داعش خراسان جنگریلریگه قرشی عملي و تېکشیریلهدیگن چارهلر کۉریشنی طلب قیلگنینی هم معلوم قیلگن.
وزیرلیک بیاناتیده ایتیلیشیچه، پاکستان «دۉست و برادر دولتلر» واسطهچیلیگیده طالبان بیلن بیر نېچه باسقیچلی مذاکرهلر آلیب بارگن، بیراق طالبان ترورچی گروهلرگه قرشی انیق و ثمرهلی چارهلر کۉریش بۉییچه مجبوريهتلرینی بجرمهگن.
پاکستان ینه بیر بار آگاهلنتیریب، اگر طالبان ترورچی تشکیلاتلرگه باشپناه بېریشده دوام اېتسه، اسلام آباد ملي خوفسیزلیک و اۉز فقرالرینی حمایه قیلیش مسألهسیده مُراضاتگه بارمسلیگینی بیلدیرگن.
پاکستان رسميلری تحریک طالبان پاکستان رهبرلری و اعضالری افغانستانده یشهیاتگنی همده طالبان تامانیدن قۉللب-قوّتلنهیاتگنینی ادعا قیلماقده.
بیراق طالبان بو عیبلاولرنی رد اېتیب، افغانستان حدودیدن باشقه دولتلرگه قرشی فایدهلنیشگه هېچ بیر گروهگه رخصت بېریلمسلیگینی تأکیدلهماقده.
مذکور مسأله سبب ایکّی تامان اۉرتهسیده ایکّی مراتهبه قوراللی تۉقنهشوو یوز بېرگن. تخمیناً اوچ آی اوّل باشلنگن سۉنگگی ماجرا حلی هم دوام اېتماقده و تامانلر چېگرهلرنی قَیته آچیش، تجارت-ترانزیت علاقهلرینی تیکلش همده ماجرانی تۉلیق توگهتیش بۉییچه یکوني کېلیشووگه اېریشه آلمهگن.
