پاکستان باش وزیری شهباز شریف مملکت نینگ فدرال ایالتلری حاکمیتلریگه افغانستانلیک برچه مهاجرلرنی درحال چیقریب یوباریش اوچون ضرور چارهلرنی کۉریشنی تاپشیردی.
جیو نیوز خبریگه کۉره، او جمعه کونی ( ۲۵میزان) اۉتکزیلگن فوق العاده ییغیلیشده شوندهی دېگن: «پاکستان اېندی افغان مهاجرلرینی مهمان قیلیش یوکینی کۉتره آلمهیدی» شریف، یقینده طالبان بیلن یوز بېرگن تۉقنهشووگه اشاره قیلیب، قۉشیمچه قیلگن:
«اېندی پاکستان خلقی حکومتدن سۉرهماقده قچان بیز افغان مهاجرلرینی مهمان قیلیشنی تۉختهتهمیز؟»
ییغیلیشده اشتراک اېتگن رسميلر نینگ معلوم قیلیشیچه، افغان مهاجرلرینی چیقریب یوباریش جریانی الّهقچان باشلنگن و حاضرگه قدَر 1 میلیون 477 مینگ 592 کیشی مملکتدن چیقریلگن.
رسميلرنینگ تأکیدلشیچه، هېچ بیر افغان مهاجری نینگ یشش مدتی اوزهیتیریلمهیدی و فقط عملده بۉلگن ویزهگه اېگه شخصلر پاکستانده قالیش حقوقیگه اېگه بۉلهدی.
اولر نینگ سۉزلریگه کۉره، مهاجرلر نینگ تېزراق قَیتیشینی تأمینلش اوچون چېگره اۉتیش جایلری سانی کۉپهیتیریلهدی، و حجتسیز افغانلرنی یشیریش یاکه مهمانخانهلرده جایلشتیریش «جنایي ایش» صفتیده کۉریلهدی.
باش وزیر شریف برچه فدرال ایالتلر رسميلرینی اوشبو قرارنی عملگه آشیریشده همکارلیککه چقیردی.
او، شونینگدېک، کېکسهلر، عیاللر، بالهلر و آزچیلیکلرگه حرمت بیلن مناسبتده بۉلیشنی، همده خلقنی بو سیاستنی عملگه آشیریش جریانیگه جلب اېتیشنی توصیه قیلگن.
بو قرار پاکستان و طالبان کوچلری اۉرتهسیده تۉرت کون دوام اېتگن چېگره تۉقنهشوولریدن سۉنگ، چارشنبه کونی آتش کېسین توزیلگچ، قبول قیلینگن. بوگون تامانلر آتش کېسیمنی اوزهیتیریشگه هم کېلیشگن.
پاکستان حکومتی نینگ ایتیشیچه، ترورچی گروهلر افغانستان حدودیدن پاکستانگه قرشی هجوملر اویوشتیرماقده.
باش وزیر شریف نینگ سۉزلریگه کۉره، کۉپ بار دیپلوماتیک اورینیشلرگه قرهمهی، طالبان بو گروهلرنینگ افغانستان حدودیدن فایدهلنیشی نینگ آلدینی آلالمهگن.
طالبان اېسه بو عیبلاولرنی رد اېتیب، پاکستان حکومتینی مملکت خوفسیزلیگینی تأمینلشدهگی عاجزلیکده عیبلهماقده.
