فنلندده افغانستانلیک هزارهلر مدني میراثینی تنیشتیریش مقصدیده «ایلدیزلر و جلوهلر» ناملی کۉرگزمه تشکیل اېتیلدی. اونده فنلند پارلمانی وکیللری همده اوشبو مملکتنینگ بیر قطار مدني و فرهنگی کیشیلری اشتراک اېتدی.
مذکور کۉرگزمه فنلنددهگی هزارهلر مدنیت اویی و «هلینا راوتاوارا» موزیمی تامانیدن تشکیل قیلینگن بۉلیب، جاري ییل نینگ اگست آیی آخریگچه تشریف بویورووچیلر اوچون آچیق بۉلهدی.
کۉرگزمهده هزاره خلقینینگ عنعنوي تقینچاقلری، ملي کییملری، هنرمندچیلیک بویوملری همده هزارهلرنینگ تاریخي و یازمه میراثیگه عاید اَیریم اثرلر نمایشگه قۉییلگن.
تشکیلاتچیلرنینگ تأکیدلشیچه، «اوشبو کۉرگزمه هزاره جمعیتی نینگ تاریخی، صنعتی، هنرمندچیلیگی، ملي کییملری و مدني اۉزلیگینی تشریف بویورووچیلرگه تنیشتیریشگه قرهتیلگن مدني تشبثدیر».
کۉرگزمهنینگ آچیلیش مراسمی دایرهسیده «هزاره مدنیتی: برقرارلیک و ماسلشووچنلیک» موضوعسیده دوره صحبتی هم اۉتکزیلدی. اونده «اینکا هوپسو» فینلنديه پارلمانی اعضاسی، «وانتا»ی شههری کېنگشی اعضالریدن بیری، انسان حقوقلری فعالی همده هزارهلر مدنیت اویی وکیلی اشتراک اېتدی.
صحبت قتنشچیلری هزاره خلقی مدنیتی حقیدهگی اۉز تجربه و قرهشلری بیلن اۉرتاقلشیب، جماعهوي همکارلیک، تینچ-تاتوو یشش روحی، علم-فنگه قیزیقیش همده تورلی مدنیتلرگه ماسلشه آلیشنی هزاره مدنیتی نینگ مهم خصوصیتلری صفتیده تأکیدلشدی.
شونینگدېک، اولر مدنیت نینگ مهاجر جمعیت اۉزلیگینی سهقلب قالیشدهگی اۉرنی، مدنیتلررا ملاقات نینگ اهمیتی، مهاجرت بیلن باغلیق معمالر و هزاره جمعیتی نینگ فنلند مدني خیلمه-خیللیگینی باییتیشدهگی حصهسی حقیده هم فکر المشدیلر.
کۉرگزمه دایرهسیده «کهن یادگار سرزمین آذر» ناملی حجتلی فلم هم نمایش اېتیلدی. فلم رژیسوری سمیع عطایی بۉلیب، اونده هزاره خلقی نینگ تورموش طرزی و عرف-عادتلری تصویرلنگن. شونینگدېک، حفیظ حبیبی اشتراکچیلر اوچون دَمبوره چهلیب، قۉشیقلر اجرا اېتدی.
