افغانستان خبرچیلر مرکزینینگ معلوم قیلیشیچه، طالبلر سۉنگّی کونلرده کمیده اوچ خبرچینی حبسگه آلیب، ینه اوچ ژورنالیستگه تهدید قیلگن.
افغانستان خبرچیلر مرکز بوگون (یکشنبه، ۲۰-ثور) نشر قیلگن بیاناتیده طالبان استخبارات ادارهسی « پیگرد خبرگزارلیگی» باشلیغی همده ژورنالیست جاوید نیازي همده «طلوع نیوز» ژورنالیستلری منصور نیازي و عمران دانشنی حبسگه آلگنینی بیلدیرگن.
بیاناتگه کۉره، جاوید نیازي اۉتگن هفته چهارشنبه کونی طالبان استخبارات ادارهسیگه چقیریلگنیدن سۉنگ قۉلگه آلینگن. منصور نیازي اېسه پنجشنبه کونی کابلنینگ کارته چهار منطقهسیده حبسگه آلینگن.
طلوع نیوز هم منصور نیازي و عمران دانشنینگ طالبلر استخباراتی تامانیدن قۉلگه آلینگنینی تصدیقلهگن، بیراق قۉشیمچه تفصیلات بېرمهگن.
افغانستان خبرچیلر مرکزی ینه کمیده اوچ ژورنالیست آخرگی تۉرت کون ایچیده تهدیدگه اوچرهگنینی بیلدیرگن، اما خوفسیزلیک سببلی بو حقدهگی تفصیلاتلر آشکار قیلینمهگن.
خبرچیلرنینگ حبسگه آلینیشی و تهدید قیلینیشینینگ سببلری حاضرچه نامعلوم.
مرکز «مملکتده ژورنالیستلرنی حبسگه آلیش و تهدید قیلیشنینگ ینگی تۉلقینیدن جدّي خواطر» بیلدیرگن همده طالباندن قۉلگه آلینگن ژورنالیستلر و باشقه قماقدهگی میدیا خادملرینی آزاد قیلیشنی طلب قیلگن.
شونینگدېک، مرکز خبرچیلر اۉز کسبي حقوقلریدن قۉرقوو و تهدیدسیز فایدهلنیشیگه امکان بېریلیشی کېرهکلیگینی تأکیدلهگن.
افغانستان ژورنالیستلر مرکزی حساباتلریگه کۉره، حاضرده کمیده یېتّی ژورنالیست طالبان قماقلریده سقلنماقده. اولرنینگ اَیریملری یقینده حبسگه آلینگن بۉلسه، باشقهلری اېسه جزا مدتینی اۉتهماقده.
