طالبلرنینگ بدخشاندهگی امنيه قوماندانلیگی اوشبو ولایتنینگ ارگو اولسواللیگیده کۉکناری میدانلرینی یۉق قیلیش مسألهسی یوزهسیدن یوزهگه کېلگن ناراضیلیکلر دوامیده کمیده ایکّی کیشی اۉلدیریلگنینی تصدیقلهدی.
طالبلر امنيه قوماندانلیگی مطبوعات سۉزلاوچیسی احسانالله کامگار بوگون (شنبه،۱۹ ثور) بو رقملرنی تصدیقلب، نمایشچیلرنی «ترتیبسیزلیک چیقرووچیلر» دېب اتهدی.
اونینگ ایتیشیچه، اوشبو گروهنینگ نرکوتیکلرگه قرشی کورهش بۉلینمهسی کېچه ارگو تومنیدهگی « آتن جلو» قیشلاغیگه کۉکناری میدانلرینی یۉق قیلیش اوچون بارگن، بیراق اَیریم دهقانلر و محلي اهالی «جنایتچی شخصلر همده نرکوتیک مادّهلر قاچاقچیلری نینگ تحرکی بیلن» کۉکناری میدانلرینی بوزیشگه تۉسقینلیک قیلیشگه اورینگن و یوزهگه کېلگن کېسکینلیک نتیجهسیده بیر باله هلاک بۉلگن.
طالبلرنینگ بدخشاندهگی امنيه قوماندانلیگی سۉزلاوچی بوگون هم شو قیشلاق نینگ اَیریم اهالیسی «غرضلی شخصلر و نرکوتیک سوداسی ترماقلری نینگ تحریکی بیلن» «ناراضیلیک و ترتیبسیزلیک» قیلگنینی، بو نینگ عاقبتیده بیر کیشی هلاک بۉلگنینی ایتدی.
او شونینگدېک، نمایشچیلر بوگون کشم فیض آباد ترانسپورت یۉلینی قیسقه مدتگه یاپیب قۉیگنینی، بیراق طالبان محلي مسووللری، دیني علمالر و قبیله آقسقاللری سعی-حرکتلری بیلن یۉل قَیته آچیلگنینی تأکیدلهدی.
طالبل نینگ بدخشاندهگی امنيه قوماندانلیگی سۉزلاوچیسی حدوددهگی وضعیت حاضر «عادي» اېکنینی و حالت اوشبو گروه کوچلری نظارتیگه آلینگنینی دعوا قیلگن.
بوندن آلدین محلي منبعلر ارگو تومنیدهگی « آتن جلو» قیشلاغاینینگ ایکّی نفر اهالیسی «طالبان کوچلرینینگ اۉق اوزیشی» عاقبتیده هلاک بۉلگنی و ینه بیر نېچه کیشی یرهلنگنینی خبر قیلگن اېدی.
محلي اهالی طالباننی کۉکناری میدانلرینی یۉق قیلیشنی «بهانه» قیلیب، اولرنی تعقیب و تضییققه دچار اېتهیاتگنلیکده همده اولرگه «حقارتاموز» و «کمسیتووچی» مناسبتده بۉلهیاتگنلیکده عیبلهماقده.
افغانستان شِمالی-شرقیدهگی بدخشان اهالیسی سۉنگگی ییللرده کۉکناری میدانلرینی یۉق قیلیش مسألهسی یوزهسیدن بیر نېچه بار طالبلر کوچلری بیلن تۉقنهشگن. اۉتگن ییللردهگی بوندهی تۉقنهشوولرده هم طالبلرنینگ نرکوتیکلرگه قرشی کورهش کوچلری تامانیدن اۉق اوزیلیشی عاقبتیده بیر نېچه محلي اهالی وکیللری هلاک بۉلگن و یرهلنگن. اوشبو ماجرالرنینگ اساسي مرکزلری درآییم و ارگو تومنلری بۉلیب کېلگن.
