محلي منبعلر بدخشانده طالبلر کوچلرینینگ نمایشچیلرگه قرهته اۉق اوزیشی عاقبتیده ارگو تومنیده کمیده ایکّی کیشی جان بېرگن و ینه بیر نېچه کیشی یرهلنگنی حقیده خبر بېرماقده.
منبعلرگه کۉره، اوشبو ناراضیلیک نمایشلری تیناوون اېرتهلبدن (۱۸ ثور، جمعه کونی) ارگو تومنی نینگ « آتن جلو» قیشلاغیده باشلنیب، طالبان بیلن محلي اهالی اۉرتهسیده کۉکناری میدانلرینی یۉق قیلیش مسألهسی یوزهسیدن کېلیب چیققن کېسکینلیک آرتیدن هنوز دوام اېتماقده.
منبعلرنینگ ایتیشیچه، تیناوون اېرتهلب طالبان و محلي اهالی اۉرتهسیدهگی کېسکینلیک کوچهیگنیدن سۉنگ، طالبلر کوچلری آدملرگه قرهته اۉق اوزگن. نتیجهده بیر ییگیت هلاک بۉلیب، اوچ کیشی یرهلنگن.
منبعلرنینگ معلوماتیگه کۉره، بوگون اېرتهلب (۱۹ثور، شنبه کونی) هم طالبان کوچلری اوشبو قیشلاقدهگی نمایشچیلرگه قرهته اۉق اوزگن. نتیجهده «عبدالرحیم» اسملی بیر کېکسه اېرکک هلاک بۉلگن و ینه بیر نېچه کیشی یرهلنگن.
منبعلرنینگ ایتیشیچه، محلي اهالی تیناوون طالبان اۉقیدن هلاک بۉلگن ییگیت نینگ جسدینی ناراضیلیک بېلگیسی صفتیده بدخشان -تخار ترافیک یۉلی چېتیگه قۉییب، اوشبو یۉلنی وقتینچه تۉسیب قۉیگن.
منبعلر خبریگه کۉره، حاضرده اوشبو یۉل قَیته آچیلگن، بیراق محلي اهالی بیلن طالبلر کوچلری اۉرتهسیدهگی کېسکینلیک هنوز سهقلنیب قالماقده و ناراضیلیکلرنینگ ارگو تومنی نینگ باشقه حدودلریگه هم یاییلیش احتمالی موجود.
منبعلر ینه طالبان « آتن جلو» قیشلاغیدهگی مابیل علاقه ترماقلری آنتنلرینی اۉچیریب قۉیگنی و نمایشلرنی باستیریش حرکتلرینی کوچهیتیرگنینی اَیتماقده.
اَیریم منبعلر، شونینگدېک، بدخشاندهگی طالبان واليسی، امنيه قوماندانی و استخبارات باشلیغی نمایشچیلر بیلن مذاکره اۉتکزیش مقصدیده « آتن جلو» قیشلاغیگه بارگنینی بیلدیرگن. بیراق نمایشچیلر اولر بیلن اوچرهشیشگه راضی بۉلهدیمی یاکه یۉقمی، حاضرچه انیق اېمس. منبعلرگه کۉره، نمایشچیلر کېچه طالبان هیئتسی بیلن اوچرهشیشدن باش تارتگن.
محلي اهالی طالباننی کۉکناری میدانلرینی یۉق قیلیشنی «بهانه» قیلیب، اولرنی تعقیب و تحقیرلرگه دچار اېتهیاتگنلیکده همده اولرگه «حقارتاموز» و «کمسیتووچی» مناسبتده بۉلهیاتگنلیکده عیبلهماقده.
افغانستان شِمالی-شرقیدهگی بدخشان اهالیسی سۉنگگی ییللرده کۉکناری میدانلرینی یۉق قیلیش مسألهسی یوزهسیدن بیر نېچه بار طالبان کوچلری بیلن تۉقنهشگن. اۉتگن ییللردهگی بوندهی تۉقنهشوولرده هم طالبان نینگ نرکوتیک مادّهلر بیلن کورهش کوچلری تامانیدن اۉق اوزیلیشی عاقبتیده بیر نېچه محلي اهالی وکیللری هلاک بۉلگن و یرهلنگن. اوشبو ماجرالرنینگ اساسي مرکزلری درآییم و ارگو تومنلری بۉلگن.
طالبان رسميلری حاضرچه بدخشاندهگی ینگی تۉقنهشوولر و ناراضیلیکلرگه مناسبت بیلدیرمهگن. اما اۉتگن ییللرده اولر کابلدن هیئتلر یوباریش آرقهلی ناراضیلیکلرنی یکونلشگه موفق بۉلگن اېدی.
