افغانستاننینگ سابق حکومت دوریده فاریاب ولایتی والیسی بۉلگن نقیبالله فایق، طالبلر رهبری هبتالله آخوندزاده طالبان اوشبو گروهنینگ فاریابدهگی مسووللریگه ناقللرگه (کۉچیریلگن) اهالیگه امکان قدَر تېزراق تذکره و یېر ترقهتیش حقیده کۉرستمه بېرگنی حقیده معلوم قیلدی.
فایق دوشنبه کونی(۱۴ ثور) اۉزینینگ فیس بوک صحیفهسیده یازیشیچه، اوشبو بویروق چیقریلگچ، طالبلرنینگ اقتصادی مسالهلر بۉییچه اۉرین باسری عبدالغنی برادر اونینگ تېزکار اجراسینی تأمینلش اوچون فاریابگه سفر قیلگن و «تذکره ترقهتیش جریانینی بېواسطه نظارت قیلیش اوچون بیر هفته دوامیده شِمالده قالگن.»
اونینگ ینه شوندهی قۉشیمچه قیلیشیچه، «ملا برادر تامانیدن بیر نېچته خیالي لایحهلرنینگ آچیلیشی خلق غضبینی باسیش اوچون اویوشتیریلگن بیر خیالي نمایش اېدی. مولوي فضلی [عبدالاحد فضلی] اېسه، اهالینینگ ناراضیلیگینی باستیریب، تذکره ترقهتیشنی کتّه قومي موفقیت صفتیده عملگه آشیرگنی اوچون وزیرلیک لوازمیگه کۉتریلدی.»
فاریاب ولایتینینگ سابق والیسی فایق نینگ دعوا قیلیشیچه، «کېینگی قدم یوز مینگلب وزیرستانلیکلرنی کۉچی و مهاجر نامی آستیده افغانستان شِمالیگه جایلشتیریش بۉلهدی.»
او، شونینگدېک، طالبان نینگ فاریاب ولایتی امنیه قوماندانلیگی تامانیدن یوباریلگن بیر مکتوبنی هم نشر قیلگن. اونده قرمقول، قورغان، اندخوی، خان چارباغ و دولتآباد اولسواللیکلری امنیه قوماندانلریدن «قرمقال تومنیدهگی میزراقوم قیشلاغی اهالیسی اوچون تذکره ترقهتیشدهگی معمالرنی حل قیلیش» یوزهسیدن هبتالله آخوندزاده نینگ ۶۵۷۸سانلی بویروغیگه موافق اوچ کون ایچیده گزارش بېریش طلب قیلینگن.
نقیبالله فایق بوندن آلدین هم «یقینده فاریاب والیسیگه قرمقول و دولت آباد حدودلریده جایلشگن کۉچیلرگه تذکره بېریش و هر بیر تذکره اېگهسیگه یوز جېریب یېر اجرهتیش حقیده کۉرسهتمه بېریلگنی حقیده هم یازگن اېدی.
اونینگ ایتیشیچه، «مینگلب بېگانه مهاجرلر قرمقولنینگ میزراقوم قیشلاغی و دولت آبادنینگ جنگل قیشلاغیگه کۉچیریلگن.»
فایق نینگ یازیشیچه، طالبان بو ایش آرقهلی اوچ مقصدنی کۉزلهماقده: «کۉچیلرگه یېر و ییلاو بېریش، شمالي حدودلرده اېتنیک و دېموگرافیک ترکیبنی اۉزگرتیریش همده عبدالرحمنخان دوریده باشلنگن، افغانستان چېگرهلرینی معلوم بیر گروه آرقهلی قمرب آلیش سیاستینی دوام اېتتیریش.»
اونینگ قۉشیمچه قیلیشیچه، «قرمقول غربده تورکمنستان بیلن چېگرهداش بۉلیب، عیناً شو چېگره حدودلریگه بېگانه کۉچیلر جایلشتیریلگن.»
آلدین هم قرهمقال اولسواللیگی اهالیسی کۉچیلرگه تذکره بېریلیشیگه قرشی ناراضیلیک نمایشلری اۉتکزگن اېدیلر.
طالبان حاضرگچه بو ادعالرگه رسماً مناسبت بیلدیرمهگن.
بو گروه ایلگری هم افغانستاننینگ شمالي و باشقه اَیریم حدودلریده دېموگرافیک ترکیبنی اۉزگرتیریشگه اورینیشده عیبلنگن.
طالبان 2023-ییلده «وزیرستانلیک مهاجرلر»نی مملکت نینگ جَنوبي، مرکزي و شمالي ولایتلریگه جایلشتیریش نیتیده اېکنینی بیلدیرگن اېدی.
بیراق، محلي اهالی وکیللری طالبان تحریک طالبان پاکستان اعضالری و کۉچیلرنی شِمالده جایلشتیرهیاتگنینی، بونینگ آرتیده «دېموگرافیک ترکیبنی اۉزگرتیریش» مقصدی بارلیگینی تأکیدلهگن.
