بیرلشگن ملتلر تشکیلاتی «خلق ارا مطبوعات کونی» مناسبتی بیلن معلوم قیلیشیچه، ایشانچلی و تصدیقلنگن اخباراتگه اېریشیش امکانیتی تنلاو اېمس، بلکه تینچ، عدالتلی و برقرار جمعیتلر شکللنیشینینگ اساسي شرطی دیر.
بیرلشگن ملتلر تشکیلاتینینگ بوگون (یکشنبه، ۱۳-ثور) اعلان قیلینگن بیاناتیده ایتیلیشیچه، تشکیلات جهان مطبوعات اېرکینلیگی کونی مناسبتی بیلن سۉز اېرکینلیگینی حمایه قیلیش و خبرچیلیک فعالیت تینچلیک نینگ مهم اوستونلریدن بیری صفتیده قۉللب-قوّتلشگه اورغو بېرگن.
بیرلشگن ملتلرنینگ تأکیدلشیچه، «خبرچیلیک تینچلیکنی شکللنتیریش و مستحکملشده حل قیلووچی رۉل اۉینهیدی».
تشکیلات ایشانچلی و تصدیقلنگن اخباراتگه اېریشیش مهملیگینی ینه بیر بار قید اېتیب، ناتۉغری و بوزیب کۉرسهتیلگن معلوماتلرنینگ عاقبتلریدن آگاهلنتیرگن.
بیرلشگن ملتلر تشکیلاتیگه کۉره، «اخباراتنی بوزیب تلقین قیلیش اجتماعي بیردملیکنی ضعیفلشتیرهدی و جماعتچیلیک ایشانچینی استه-سېکین یېمیرهدی».
تشکیلاتنینگ قۉشیمچه قیلیشیچه «اخبارات ایرکین و حقیقتگه اساسلنگن بۉلسه، او حسابدارلیکنی کوچهیتیرهدی، کانتروکتیف ملاقات اوچون زمین یرهتهدی و انسان حقوقلرینی حمایه قیلهدی.»
شو بیلن بیرگه، طالبان افغانستان اوستیدن قَیته نظارتنی قۉلگه آلگنیدن بېری اخباراتگه اېریشیشنی کېسکین چېکلب، یېتکرمه و ژورنالیستلر فعالیتیگه کېنگ قمراولی چېکلاولر جاري اېتگن.
مذکور گروه بیر نېچه بار یېتکرمه ادارهلریگه باستیریب کیرگن، ژورنالیستلر و عاموی اخبارات واسطهلری خادملرینی حبسگه آلگن همده اَیریم یېتکرمهلر فعالیتینی تۉختهتگن.
