طالبلر عدلیه وزیرلیگینینگ معلوم قیلیشیچه، اوشبو گروه نینگ مخصوص محکمهسی خوست ولایتینینگ اسماعیلخیل و مندوزي اولسواللیگیده جایلشگن۱۲ مینگ۵۰۰ جېریبدن آرتیق یېرنی «امارتگه تېگیشلی» دېب اعلان قیلگن.
وزیرلیک بوگون (شنبه، ۱۲-ثور) نشر قیلگن بیاناتده ایتیلیشیچه، «مرکزي زون بۉییچه امارت یېرلرینینگ ناقانوني اېگهللنیشی بیلن باغلیق ایشلرنی کۉریب چیقهدیگن مخصوص محکمه حجت و دلیللرنی تېکشیریب چیقیب، اسماعیلخیل و مندوزي اولسواللیگیده جایلشگن ۱۲ مینگ۵۰۵ جېریب یېر نینگ برچهسی امارتگه تېگیشلی، دېگن قرارگه کېلگن».
قۉشیمچه قیلینیشیچه، بو یېر میدانی اسماعیلخیل و مندوزي اولسواللیگینینگ «صحرا» قیشلاغیده جایلشگن بۉلیب، بیرته کادستر اوچستکهسینی اۉز ایچیگه آلهدی.
طالبان عدلیه وزیرلیگینینگ بیلدیریشیچه، «یېرلرنی ناقانوني اېگهللش نینگ آلدینی آلیش و اېگهللنگن یېرلرنی قَیتریش کمیسیونسی» اوّل هم اوشبو یېرلرنی کۉریب چیققن و قرار چیقرگن اېدی. بیراق اَیریم شخصلرنینگ یېرگه اېگهلیک دعواسی اساسیده و تېگیشلی قانون نینگ ۱۷-مادّهسیگه موافق ایش رسمي روشده مرکزي زون مخصوص محکمهسیگه تاپشیریلگن.
وزیرلیکنینگ دعواسیگه کۉره، مخصوص محکمه «دعواگرلر حجتلری، کمیسیون ماتریاللری، یېر کادستری معلوماتلری و تېگیشلی ادارهلردن آلینگن اخباراتلرنی سینچیکلب اۉرگنیب، اوشبو یېر بلند، سووسیز و اېکین اوچون یراقسیز بۉلیب، کادستر حجتلریده هم دولت نامیگه قید اېتیلگنینی انیقلهگن».
شو اساسده محکمه برچه حجت و دلیللرنی کۉریب چیقیب، «یېرنینگ برچهسی امارهتگه تېگیشلی» دېگن یکوني قرارنی چیقرگن.
بیاناتده ینه قید اېتیلیشیچه، مخصوص محکمه قراریگه بناءً، «یېرلرنی ناقانوني اېگهللش نینگ آلدینی آلیش و اولرنی قَیتریش کمیسیونسی اوشبو یېر یوزهسیدن بېلگیلنگن ترتیبده چارهلر کۉرهدی».
طالبان افغانستانده قَیته حاکمیتنی اېگهلهگنیدن سۉنگ، مملکتنینگ تورلی ولایت و شهرلریده مینگلب جېریب یېرلرنی «امارهتگه تېگیشلی» دېب اعلان قیلیب کېلماقده.
اوشبو گروه اۉتگن هفته کابل نینگ غربیده جایلشگن «امید سبز» شهرچهسیده۱۵۰۰ جېریبدن آرتیق و کابل نینگ ۱۶-تومنیده۸۴۱ جېریبدن زیاد یېرلرنی هم «امارتگه تېگیشلی» دېب اعلان قیلگن اېدی.
بیراق یېر اېگهلری و شهرچه اهالیسی طالبان محکمهلری اولرنینگ حجتلرینی تۉغری کۉریب چیقمهیاتگنی و چیقریلهیاتگن قرارلر خالص همده عدالتلی اېمسلیگینی تأکیدلهگن.
