افغانستان سابق نمایندهلر مجلسینینگ اعضاسی فوزیه کوفی، طالبان اونینگ شخصي اویینی «باسیب آلگنی» و اَیریم قرینداشلری همده بدخشانلیکلرنی حبسگه آلگنینی اَیتگن.
کوفی بوگون (شنبه، 12-ثور) بیانات نشر قیلیب، اویی نینگ مصادره قیلینگنی و قرینداشلری طالبان تامانیدن حبسگه آلینگنینی تصدیقلهدی، اما حبسگه آلینگنلر سانینی انیق کۉرسهتمهدی.
اونینگ ایتیشیچه، طالبان اوچ آی اوّل اونینگ اوییگه باستیریب کیریب، اونی اېگهللب آلگن. شوندن سۉنگ، اۉشه اویده یشب کېلگن عایله اعضالری و یقینلری باشقه جایگه کۉچیشگه مجبور بۉلگن.
اونینگ ینه قۉشیمچه قیلیشیچه، اۉتگن هفته سهشنبه کونی (۸ثور) طالبان ینگی منزلگه هم هجوم قیلگن و اونینگ اَیریم قرینداشلری همده او بیلن قرینداشلیک علاقهسی بۉلمهگن «بدخشانلیک هم یورتلر»نی حبسگه آلگن.
فوزیه کوفینینگ ایتیشیچه، حبسگه آلینگنلرنینگ عایلهلری اۉشندن بېری اولرنینگ احوالیدن بې خبر. اونینگ سۉزلریگه کۉره، حبسگه آلینگنلردن ایکّی نفری ساغلیق معمالریگه هم اېگه.
کوفی شوندهی دېگن: «بوندهی هجوم قۉرقاقانه حرکت بۉلیب، طالبان بیر تاماندن ضعیفلیک، بېقرارلیک و پرچهلنیش حالتیده اېکنینی، باشقه تاماندن اېسه افغانستان عیاللری نینگ کورهشی تأثیرلی و حل قیلووچی بۉلگنینی کۉرسهتهدی.»
اوشبو سابق نماینده«اېرکینلیکنی تأمینلش و خلق نینگ شأنی همده انساني قدر-قیمتینی تیکلش» یۉلیده کورهشنی دوام اېتتیریشینی تأکیدلهدی.
بوندن آلدین محلي منبعلر کابلده طالبان استخباراتی تامانیدن فوزیه کوفینینگ اَیریم یقینلری حبسگه آلینگنی حقیده خبر بېرگن اېدی. جملهدن، منبعلرگه کۉره، بدخشانلیک انجنیر همایون خواهانی اۉتگن سهشنبه کونی حبسگه آلینگن و حاضرگچه اونینگ تقدیری نامعلوم.
طالبان رسميلری حاضرگچه اوی مصادره قیلینیشی و قرینداشلرنینگ حبسگه آلینیشی یوزهسیدن ایضاح بېرمهگن.
طالبان افغانستانده قَیته حاکمیتنی قۉلگه آلگنیدن بېری باشقه اَیریم سیاسي اربابلر نینگ اوی-جای و مال-ملکلرینی هم مصادره قیلگنی ایتیلهدی.
شونینگدېک، بو گروه سابق حکومت عملدارلری و حربيلرینینگ قرینداشلرینی حبسگه آلیش و قییناققه سالیشده هم عیبلنماقده.
