منبعلرگه کۉره، کنر ولایتینینگ دانگام اولسواللیگی پاکستان تامانیدن اویوشتیریلگن راکت هجوملری عاقبتیده بیر باله جان بېرگن ینه تۉرت کیشی، جملهدن اوچ عیال یرهلنگن.
منبعلرنینگ ایتیشیچه، هجوم بوگون (پنجشنبه، ۱۰-ثور) ساعت تخمیناً ۷:۰۰ اطرافیده دانگام اولسواللیگی اداری بناسی یقینیده صادر اېتیلگن.
یرهدارلر دوالنیش اوچون محلي طبي مرکزگه یېتکزیلگن، اما اولرنینگ احوالی حقیده انیق معلومات بېریلمهگن.
حاضرچه طالباننینگ کنر ولایتیدهگی محلي مسووللری اوشبو هجوملر یوزهسیدن ایضاح بېرمهگن.
سۉنگگی کونلرده پاکستان تامانیدن کنر ولایتینینگ تورلی حدودلریگه هجوملر دوام اېتماقده.
جاري هفتهنینگ دوشنبه کونی اسعدآباد شهریدهگی بیلیم یورت همده دانگام، سرکانو و منوگی اولسواللیکلریگه قیلینگن هجوملرده کمیده یېتّی کیشی هلاک بۉلگن، 90 دن آرتیق کیشی اېسه جراحت آلگن.
طالبان بو هجوملرگه جوابن پاکستاننینگ کابلدهگی اېلچیسینی چقیریب، اعتراض نامهسینی تاپشیرگن.
طالبان و پاکستان اۉرتهسیدهگی کېسکینلیک ایکّی آیدن آرتیق وقتدن بېری دوام اېتماقده. منطقهدهگی بیر قطار دولتلرنینگ واسطهچیلیک حرکتلریگه قرهمهی، تامانلر حاضرگچه تۉلیق صلح بۉییچه کېلیشووگه اېریشمهگن.
