اوچانینگ معلوم قیلیشیچه، افغانستانده سوو تاشقینلریدن ضرر کۉرگن اۉتیز بیرمینگ ۱۰۰ کیشیگه حاضرگچه انسانپرورلیک یاردم یېتکزیلگن.
اوچا گزارشیگه کۉره، سېل عاقبتیده «بیر نېچه یوز کیشی» جان بېرگن یاکه جراحتلنگن، بیر مینگ۵۰۰ ته اوی بوتونلهی ویران بۉلگن و ینه آلتی مینگ ته اوی ضرر کۉرگن.
شونینگدېک، حاضرگچه اېللیک تۉقیزمینگ۹۰۰ کیشی یاردمگه محتاج آدم انیقلنگن بۉلیب، ینه۳۱ ته اولسواللیکده بهالش ایشلری دوام اېتماقده.
گزارشده ایتیلیشیچه، انیقلنگن احتیاجمندلرنینگ اۉتیز بیر مینگ ۱۰۰کیشیسی آزیق-طعام، نقد پول یاردمی، باشپناه، ناازیق-طعام محصولاتلری، سوو، بهداشت و نظافت، ساغلیقنی سقلش و آزیقلنیش خدمتلری همده حمایه یاردمینی آلگن.
اوچانینگ تأکیدلشیچه، ضرر کۉرگن منطقهلرده احتیاجلر حلی هم یوقاری و کۉپ ترماقلی بۉلیب قالگن.
کۉپلب عایلهلر اوی-جایی و تیریکچیلیک منبعلرینی یۉقاتگن یاکه کتّه ضرر کۉرگن. اَیریملر اېسه وقتینچهلیک باشپناهلرده یشهماقده، اینیقسه کنر، ننگرهار، نورستان، خوست، پکتیا و پکتیکا ولایتلریده. مرکزي ولایتلرنینگ اَیریم حدودلریده اېسه اساسي خدمتلرگه اېریشیش امکانیتی چېکلنگن حالده ینگی کۉچیشلر هم کوزهتیلگن.
بوندن تشقری، یۉللر، کۉپریکلر، مکتبلر و ساغلیقنی سقلش مرکزلری کبی آستقورمهلرنینگ ضررلنیشی کنر، ننگرهار، خوست، نورستان، پکتیکا و پکتیا ولایتلریده انسانپرورلیک یاردم یېتکزیشنی قیینلشتیرماقده.
اوچاگه کۉره، سېل آفتلری، تأمینات زنجیریدهگی اوزیلیشلر (اینیقسه آزیق-طعام و آزیقلنیش بۉییچه)، افغانستان–پاکستان چېگرهسی نینگ اوزاق مدت یاپیلیشی، طالبان و پاکستان اۉرتهسیدهگی تۉقنهشوولر عاقبتیدهگی کۉچیشلر همده مهاجرلر آقیمی کبی بیر-بیریگه باغلیق بحرانلر یاردم بېریش امکانیتینی تاباره چېکلهگن.
بو عامللر ذخیره منبعلرینینگ تېز کمهییشیگه آلیب کېلیب، یاردم تشکیلاتلری نینگ ضرور واسطهلرنی یېتکزیش و قَیته تأمینلش امکانیتینی ینه-ده قیسقرتیرماقده.
