بریتانيا مدافعه وزیرلیگی اوشبو دولت افغانستاندهگی اۉزینینگ سابق همکارلرینی مملکتدن آلیب چیقیش بۉییچه قۉللب-قوّتلشنی تۉختهتگنینی اعلان قیلدی.
بریتانيا مدافعه وزیری لوک پولارد پارلمانگه یۉلهگن مکتوبیده، کۉچیریش و قَیته جایلشتیریش اوچون ماس بۉلگن شخصلر بریتانيا ویزهسینی آلیش اوچون اۉزلری اوچینچی دولتگه باریشلری کېرهکلیگینی ایتگن.
اونینگ سۉزلریگه کۉره، بو شخصلر اوچینچی دولتگه یېتیب بارگچ، ۲۰۲۸ییلگچه بویوک بریتانيا تامانیدن قۉللب-قوّتلنهدی.
مدافعه وزیری، شونینگدېک، اوشبو دستورگه ماس کېلهدیگن شخصلر کېلگوسی۱۲آی ایچیده بریتانيا ویزه مرکزیگه مراجعت قیلیشلری لازملیگینی تأکیدلهگن.
اونینگ قۉشیمچه قیلیشیچه، اوچینچی دولتلردهگی اوشبو شخصلرنی قۉللب-قوّتلش و اولرنی بویوک بریتانياگه کۉچیریش بۉییچه یکوني مدت ۲۰۲۸-ییل دسمبر آیی بۉلیب، اوندن کېین هر قندهی یاردم تۉختهتیلهدی.
مدافعه وزیری اۉز مکتوبیده ۲۰۲۵ییلدن بویان افغانستان فقرالرینینگ عریضهلرینی کۉریب چیقیش جریانیده سېزیلرلی یوتوقلرگه اېریشیلگنینی هم قید اېتگن.
اونینگ یازیشیچه، ۲۰۲۵-ییل جولای آییده قریب۲۵ مینگ عریضه کۉریب چیقیلمهگن حالده قالگن بۉلسه، حاضرده بو رقم۱۷ مینگتهگه کمهیگن و کېلهسی ییل بهاریگچه برچه عریضهلر بۉییچه قرار قبول قیلینهدی.
وزیرنینگ ایتیشیچه، حاضرده بویوک بریتانياگه کۉچیریلیشی ممکن بۉلگن۹ مینگدن کمراق افغان فقرا قالگن.
او، شونینگدېک، مدافعه وزیرلیگی افغانستانلیک قاچقینلرنی جایلشتیریش اوچون حربي ملکلر و مهمانخانهلردن فایدهلنیشنی باسقیچمه-باسقیچ تۉختهتیشگه اورینهیاتگنینی، شو آرقهلی «افغانلرنی قَیته جایلشتیریش» دستورینی یکونلشگه یقینلشماقچی اېکنینی بیلدیرگن.
بویوک بریتانيا طالبان افغانستانده ینه حاکمیتنی قۉلگه کیریتگنیدن سۉنگ اۉزینینگ مینگلب محلي همکارلرینی آلیب چیققن، بیراق اولر نینگ اوزاق مدت دوامیده وقتینچهلیک جایلرده یشهشی تنقیدلرگه سبب بۉلگن.
شو بیلن بیرگه، افغانستاندهگی مینگلب سابق همکارلرنینگ عریضهلری هنوز کۉریب چیقیلمهگن و اولر حلی هم جواب کوتیب قالماقده.
