طالبان باش وزیری ریاست دفترینینگ باشلیغی ملا عبدالواسع بریتانیانینگ افغانستان بۉییچه مخصوص وکیلی ریچارد لیندسی بیلن اوچرهشووده ایتیشیچه، اگر پاکستان دوام اېتهیاتگن ماجرانی توگهتیش اوچون بیر قدم تشلهسه، اولر ایکّی قدم تشلهیدیلر.
او تیناوون (سهشنبه، ۸-ثور) ارگده بۉلیب اۉتگن اوشبو اوچرهشووده طالبان دایما پاکستان بیلن زۉرآورلیکنی توگهتیش و دۉستانه مناسبتلرنی مستحکملش طرفداری اېکنینی، شونینگدېک هېچ کیمگه افغانستان توپراغیدن باشقهلرگه قرشی فایدهلنیشگه یۉل قۉیمسلیگینی ایتگن.
باش وزیر ریاست دفتری باشلیغینینگ قۉشیمچه قیلیشیچه «اما پاکستان تامانیدن تینچ اهالی، اینیقسه عیاللر، بالهلر و تورر-جای بنالرینی نشانگه آلیش اوچون هېچ قندهی اساس یۉق.»
اونینگ کۉپهیتیریشیچه«بیز هېچ قندهی تجاوز قیلگنیمیز یۉق و هېچ قندهی زۉرآورلیکنی قۉللب-قوّتلهمهیمیز، اما افغانستاننینگ حاکمیتی، توپراق یخلیتلیگی و خلقینی حمایه قیلیش بیز نینگ قانوني حقوقیمیزدیر.»
بو یوقاری لوازملی طالبان رسميسی بریتانیا و باشقه دولتلر همده ایکّی تامان اۉرتهسیدهگی ماجرانی توگهتیش اوچون حرکت قیلهیاتگن تشکیلاتلردن «حقیقتنی توشونیش و عیبدار تاماننی جوابگرلیککه تارتیش»نی سۉرهگن.
طالبلر باش وزیر ریاست دفتری باشلیغی نینگ بیاناتیگه کۉره، بریتانیا مخصوص نمایندهسی اوشبو اوچرهشووده «ایشانچنی مستحکملش اوچون پاکستان تامانیگه بیر نېچه بار خبر یېتکزگنینی و هر ایکّی تامان دۉستانه محیط یرهتیش اوچون ایجابي قدملر تشلشی کېرهکلیگینی» ایتگن.
بیاناتده ریچارد لیندسی ینه شونی تأکیدلهگنکی، «اوروش هر ایکّی تامانگه معما و امیدسیزلیک کېلتیرهدی، زۉرآورلیکنی توگهتیش اوچون سیاسي جسارت و اراده کۉرسهتیش کېرهک.»
طالبان و پاکستان اۉرتهسیدهگی ماجرا ایکّی آیدن آرتیق دوام اېتماقده. شو ماجرا دوامیده پاکستان دوشنبه کونی افغانستان شرقیدهگی کنر ولایتیدهگی تورلی نشانلرگه هجوم قیلیب، جملهدن ولایت یورتینی هم نشانگه آلگن.
طالبان معلوماتیگه کۉره، اوشبو هجوملرده کمیده 7 کیشی هلاک بۉلگن و۹۰ دن آرتیق کیشی یرهلنگن. یرهلنگنلر آرهسیده کنر مرکزیدهگی سید جمالالدین افغان نامیدهگی بیلیم یورتی نینگ 30 نفر محصلی و اۉقیتووچیلری هم بار.
طالبان بو هجوملرگه جوابن کابلدهگی پاکستان اېلچیخانهسی اېلچیسینی چقیرتیریب، اونگه ناراضیلیک مکتوبینی تاپشیرگن.
طالبان و پاکستان اۉرتهسیدهگی ماجرا باشلنگنیدن بېری چین، قطر، تورکيه و سعوديه عربستانی کبی تورلی دولتلر اونی توگهتیشگه حرکت قیلماقده، اما تامانلر هنوزگچه یکوني کېلیشووگه اېریشه آلمهگن.
