یونیسفنینگ معلوم قیلیشیچه، طالبلر تامانیدن عیاللر و قیزلرنینگ تعلیم آلیشی همده ایشلشیگه قۉییلگن چېکلاو افغانستان اقتصادیاتیگه هر ییلی۵.۳میلیارد افغاني (تخمیناً۸۴ میلیون اقش دالری) مقداریده ضرر یېتکزماقده.
اوشبو تشکیلات بوگون (سهشنبه، ۸-ثور) اعلان قیلگن حساباتیده بو کۉرسهتکیچ۲۰۲۳-ییلده نا خالص تولیداتینینگ قریب۰.۵فایزیگه تېنگ اېکنینی بیلدیرگن.
یونیسفنینگ تأکیدلشیچه، «بو یۉقاتیشلر وقت اۉتیشی بیلن تۉپلنیب بارهدی، مملکتنینگ کېلهجکدهگی اقتصادي اۉسیش سرعتلرینی پهسهیتیرهدی و برقرار تیکلنیش استقباللرینی ضعیفلشتیرهدی».
تشکیلاتگه کۉره، کېنگ کۉلملی اقتصادي ضررلر بیلن بیرگه، اېنگ دالضرب خوف، افغانستاندهگی تعلیم و ساغلیقنی سقلش تیزیملری نینگ یېمیریلیشی دیر.
گزارشده قید اېتیلیشیچه، یاش عیاللرنینگ ملَکهلی ایشچی کوچیگه قۉشیلمسلیگی سببلی، کېلهجکده بو ساحهلرده کادرلر یېتیشماوچیلیگی ینهده کوچهیهدی و بو حالت عیاللر همده بالهلرنینگ خدمتلردن فایدهلنیش امکانیتیگه بېواسطه تأثیر قیلهدی.
یونیسفنینگ آگاهلنتیریشیچه، بو وضعیت آنهلر و بالهلر سلامتلیگیگه سلبي تأثیر کۉرسهتیب، حاضرگی بحراندن انچه اوزاققه چۉزیلهدیگن، اولاددن-اولادگه اۉتووچی اجتماعي-اقتصادي عاقبتلرنی کېلتیریب چیقرهدی.
حساباتگه کۉره، ۲۰۲۴-ییلدن بویان افغانستانده 7 یاشدن۱۸ یاشگچه بۉلگن۳.۸میلیون قیز باله مکتبگه باریش امکانیدن محروم بۉلگن، اولر نینگ۲.۶میلیونی اۉسمیر قیزلردیر.
سۉنگگی بېش ییل ایچیده اېسه کمیده۱ میلیون قیز باله اۉرته تعلیمگه قۉییلگن چېکلاولردن بېواسطه ضرر کۉرگن.
تشکیلاتنینگ آگاهلنتیریشیچه، اگر بو چېکلاولر دوام اېتسه، ۲۰۳۰ییلگه باریب تعلیمدن محروم بۉلگن قیزلر سانی۲ میلیوندن آشهدی.
یونیسف شونینگدېک، بو چېکلاولر نتیجهسیده یقین تۉرت ییل ایچیده افغانستان 20 مینگدن آرتیق ملَکهلی اۉقیتووچی همده بېش مینگ ۴۰۰ نفر تیارلنگن ساغلیقنی سقلش خادیمیدن اَیریلیشی ممکنلیگینی بیلدیرگن.
یونیسف طالباندن عیاللر و قیزلر تعلیمیگه قۉییلگن تعقیقنی بېکار قیلیشنی سۉرهگن، شونینگدېک خلقارا همجمعیتنی افغانستانده عیاللر و قیزلر تعلیمینی قۉللب-قوّتلشگه چقیرگن.
طالبان افغانستانده حاکمیتنی قَیته قۉلگه کیریتگنیدن سۉنگ، قیزلرنینگ ۶-صنفدن یوقاری تعلیم آلیشینی نامعلوم مدتگه منع قیلیندی. کېینچهلیک بو گروه بیلیم یورتلری و طبي انستیتوتلر اېشیکلرینی هم عیاللر اوچون یاپدی همده اولرنینگ دولت ادارهلری، محلي و خلقارا نادولت تشکیلاتلر همده بیرلشگن ملتلر تشکیلاتی ادارهلریده ایشلشینی منع اېتدی.
