بیرلشگن ملتلر تشکیلاتینینگ افغانستاندهگی یاردم ادارهسی (یوناما)نینگ معلوم قیلیشیچه، «تیناوون توشدن کېین اسعدآباد نینگ اَیریم حدودلریگه، جملهدن شرقي افغانستاندهگی بیر بیلیم یورتگه قیلینگن هجوملر عاقبتیده اۉنلب تینچ اهالینینگ هلاک بۉلیشی و جراحتلنیشی حجتلشتیریلگن».
یوناما بوگون (سهشنبه، ۸-ثور) نشر قیلگن بیاناتیده «خلق ارا انسانی حقوققه کۉره، تینچ اهالی و جماعت جایلری، جملهدن تعلیم مؤسسهلری هر دایم حمایه قیلینیشی کېرهک»لیگینی تأکیدلهگن.
بیرلشگن ملتلر تشکیلاتی نمایندهلیگی قربانلر عایلهلریگه همدردلیک بیلدیرگن و جراحتلنگنلرگه تېزراق ساغهییب کېتیشنی تیلهگن.
تیناوون توشدن کېین پاکستان کنر ولایتی مرکزی بۉلگن اسعدآباد شهری نینگ اَیریم حدودلرینی، جملهدن کنر بیلیم یورتینینگ پیداگوژي فاکولتهسی بناسینی نشانگه آلگن. شونینگدېک، پاکستان سرکانو، دانگام و منوری اولسواللیکلرینینگ اَیریم حدودلریگه هم هجوملر اویوشتیرگن.
طالباننینگ کنر ولایتی ساغلیقنی سقلش باشقرمسی معلوماتلریگه کۉره، اوشبو هجوملر عاقبتیده کمیده۷ کیشی هلاک بۉلگن و ینه۷۵ کیشی جراحتلنگن. جراحتلنگنلر آرهسیده کنر یورتینینگ۳۰ کیشی اۉقیتووچیسی و محصللری هم بار.
