طالبلر عدلیه وزیرلیگینینگ معلوم قیلیشیچه، بو گروه رهبری هبتالله آخوندزاده «مبلغلر قانونی»نی تصدیقلهگن و اوشبو قانون رسمي جریدهنینگ۱۴۸۳-سانیده اعلان قیلینگن.
وزیرلیکنینگ بوگونگی (سهشنبه،۸-ثور) بیاناتیده ایتیلیشیچه، بو قانون بیر مقّدمه، اوچ باب، ایکّی فصل و۱۷مادّهدن عبارت بۉلیب، اونینگ اجراسینی طالباننینگ «امر به معروف و نهی از منکر» وزیرلیگی عملگه آشیرهدی.
قانون نینگ 6-مادّهسیده «مبلغ» (دیني ترغیباتچی) اوچون طلبلر و صفتلر بیان قیلینگن بۉلیب، اونده «مبلغ مسلمان و حنفی مذهبیدن بۉلیشی»، «بلاغتگه یېتگن و عقلی جاییده بۉلیشی» همده «دعوت قیلهیاتگن نرسهسینی بیلیشی کېرهک» دېب کۉرسهتیلگن.
۱۰مادّهگه کۉره، دعوتچی یاکه مبلغ دعوت وقتیده قوییدهگی قاعدهلرگه رعایه قیلیشی شرط: «دعوت حنفی مذهبیگه موافق بۉلیشی»، (ایکّینچی درجهلی) اختلافلی مسألهلرنی تیلگه آلمسلیک»، «دعوت وقتیده وایهگه یېتمهگنلر و عیاللرنی اۉزی بیلن آلیب یورمسلیک»، همده «مبلغلرنی عالِملر رهبرلیگی آستیده باشقریش».
طالبان قانونیگه کۉره، افغانستاندهگی باشقه اسلامي مذهبلر، جملهدن شیعه مسلمانلری، دیني ترغیبات (دعوت) اوچون ملَکهلی دېب حسابلنمهگن.
شونینگدېک، مبللغلر «علم فضیلتی، اِیمان و اهلی سنت و جماعه عقیدهسی، عبادتلر، جهاد و زکات فضیلتی، آته-آنه، فرزند، قۉشنی، اېر-خاتین و عیاللر نینگ حقوقلری، امیرگه اطاعت، حجاب فرضی، یخشی اخلاق، مسجد آدابلری و باشقه مهم دیني مسألهلرنی» ترغیب قیلیشگه مجبور اېتیلگن.
قانونده طالبان رسميلری، اولرنینگ جنگچیلری و افغانستان اهالیسی مبللیغلر بیلن همکارلیک قیلیشگه مجبور اېکنی هم بېلگیلنگن.
طالبان حاکمیتنی قَیته اېگهلهگندن بېری افغانستاندهگی برچه قانون و ترتیبلرنی حنفی فقه اساسیده شکللنتیریب کېلماقده و بو مذهبنی مملکتنینگ رسمي دیني یۉنهلیشی صفتیده بېلگیلهگن.
شونینگدېک، بو گروه افغانستانده شیعه مذهبی نینگ رسمي مقامینی بېکار قیلگن و تورلی حالتلرده بو مذهب وکیللرینی هم اۉز قانون و قاعدهلریگه، یعنی حنفی فقه گه رعایه قیلیشگه مجبور اېتگن.
