افغانستان نینگ سابق جمهور رییسی حامد کرزی پاکستان تامانیدن کنر ولایتیدهگی نشانلرگه، جملهدن کنر بیلیم یورتیگه قیلینگن سۉنگّی هجوملرنی قارهلهدی و بو هجوملرنی «پاکستاننینگ افغانستانده تعلیم و رواجلنیش ایلدیزلرینی یۉق قیلیش سیاستی نینگ بیر قِسمی» دېب اتهدی.
او بوگون کېچقورون (دوشنبه، ۷-ثور) ایکس اجتماعی ترماغیده اعلان قیلگن پُستیده اوّل هم پاکستان هجوملری کنر ولایتینینگ نری تومنیدهگی «برېکوت» قیشلاغیده اۉقووچیلرنینگ تعلیم آلیش امکانیتیدن محروم بۉلیشیگه سبب بۉلگنینی ایتگن.
سابق جمهور رییس افغانستاندهگی وضعیتنی بیرلشگن ملتلر تشکیلاتی تامانیدن جدّي اۉرگنیلیشی و قارهلنیشی همده بوندهی هجوملرنینگ تېزده تۉختهتیلیشی کېرهکلیگینی طلب قیلگن.
طالباننینگ کنر ولایتیدهگی محلي مسووللری بوگون پېشیندن کېین پاکستان بیلیم یورت بناسی و ولایت مرکزی همده اَیریم تومنلردهگی حدودلرنی راکت هجوملری بیلن نشانگه آلگنینی تصدیقلشگن.
طالبان معلوماتیگه کۉره، اوشبو هجوملرده کمیده 4 کیشی هلاک بۉلگن و۷۰ کیشی، جملهدن۳۰ نفر طلبه جراحتلنگن.
افغانستان عالي تعلیم وزیرلیگی هم کنر بیلیم یورتیگه قیلینگن هجومنی تصدیقلب، اونده بیلیم یورت بناسی و آستقورمهگه کتّه مقدارده ضرر یېتکزیلگنینی بیلدیرگن.
