طالبلر نینگ محلي رسميلری کنر ولایتیده بوگون (دوشنبه،۷-ثور) پاکستان تامانیدن عملگه آشیریلگن هوا و راکت هجوملری عاقبتیده کمیده۳ کیشی هلاک بۉلیب، ینه 45 کیشی جراحتلنگنینی معلوم قیلدی.
طالبلرنینگ کنر ولایتیدهگی اخبارات و مدنیت بۉلیمی باشلیغی نجیباللهنینگ ایتیشیچه، هلاک بۉلگنلر و جراحتلنگنلر آرهسیده عیاللر و بالهلر هم بار.
اونینگ ینه قۉشیمچه قیلیشیچه، جراحتلنگنلر دوالنیش اوچون ولایت شفاخانهسیگه کۉچیریلگن، بیراق اولرنینگ حالتی حقیده باتفصیل معلومات بېریلمهگن.
اوّلراق محلي منبعلر «اطلاعات روز» گزېتهسیگه خبر بېریشیچه، پاکستان کنر بیلیم یورتینینگ تعلیم و تربیه فاکولتهسی بناسی همده ولایت مرکزی اسدآباددهگی یارگل حدودینی هوا هجوملری بیلن نشانگه آلگن.
منبعلرگه کۉره، شونینگدېک، پاکستان کنر ولایتینینگ دانگام، منوره و سرکانو اولسواللیکلرنینگ اَیریم حدودلرینی هم راکت هجوملریگه توتگن.
مذکور هجوملر کنر ولایتینینگ سرکانو اولسواللیگی و باجور اولسواللیگی حدودیدهگی قبیله آقسقاللری سۉنگگی کونلرده طالبان و پاکستان اۉرتهسیدهگی تۉقنهشوولرنی تۉختهتیش همده اۉت آچیشنی تۉختهتیشگه اېریشیش یۉلیده سعی-حرکتلر آلیب بارهیاتگن بیر پیتده صادر بۉلگن.
شونینگدېک، طالبان و پاکستان رسميلری یقینده اوروچیده چین واسطهچیلیگیده اۉتکزیلگن مذاکرهلرده کېسکینلیکنی کوچهیتیرووچی حرکتلردن تيیلیش بۉییچه کېلیشووگه اېریشگن اېدی.
