طالبلر بو گروه افغانستان توپراغیگه قرشی عملگه آشیریلگن ۷-ثور دولت تۉنتریشی و «اوندن کېینگی باسقین»نی قارهلشینی،۸-ثورنی اېسه «تاریخي، فخرلی غلبه، موفقیت و اللهنینگ اولوغ نعمتی کونی» دېب بیلیشینی معلوم قیلدی.
بوگون (دوشنبه، ۷-ثور) نشر قیلینگن بیاناتده ایتیلیشیچه،۱۳۵۷-ییل ۷-ثوردهگی تۉنتریش «افغانستاننی باسیب آلیش و اونگه بېگانه کمونیستیک مفکورهنی مجبورن سینگدیریش» مقصدیده عملگه آشیریلگن.
طالبان بیاناتده قۉشیمچه قیلیشیچه، افغانستان خلقی «۲۰عصرده ساویت مستملکهچیلیگی آرزوسی رۉیابگه چیقیشیگه» یۉل قۉیمهدی و ۱۴ ییل دوامیده «کورهش آلیب باریب»، ۱۳۷۱-ییل ۸-ثورده «غلبه، ظفر و مستقللیککه اېریشدی».
بیاناتده ینه تأکیدلنیشیچه، اۉشه پیتده افغانستان خلقی «14 ییللیک جهاد ثمرهسی»گه اېریشگنیدن خورسند بۉلگن و اېندی «غلبه سایهسیده تینچلیک و اۉزلری ایستهگن شریعت تیزیمی آستیده» یششنی کوتگن، بیراق «تشکیلي (تنزیمي) اوروشلر و ایچکی کېلیشماوچیلیکلر» بولرنینگ برچهسینی برباد قیلگن همده مسلمان خلقنینگ کتّه امیدلرینی و «صاف شریعت تیزیمینی برپا اېتیش» آرزوسینی امیدسیزلیککه ایلنتیرگن.
طالبلر، شونینگدېک، حاضرده اۉز مقصدلریگه «بیرلیک و همجهتلیکنی تأمینلش، ترتیبسیزلیکنی یۉقاتیش و شریعت تیزیمینی جاري اېتیش»گه اېریشگنینی تأکیدلب، اېندی «اوشبو تیزیمنی قطعي حمایه قیلیش و برچه افغانستانلیکلر برقرار همده اسلامي تیزیم بیلن بېزهتیلگن افغانستاننی مستحکملش اوچون بیرلشیب، صادق قالیشلری ضرور»لیگینی قید اېتگن.
معلومات اوچون، ۱۳۵۷-ییل ۷-ثورده افغانستان خلق دیموکراتیک حزبینینگ «خلق» و «پرچم» فراکسیونلری اۉشه پیتدهگی جمهور رییس محمد داوودخان حکومتیگه قرشی دولت تۉنتریشی عملگه آشیرگن.
اوشبو حربي تۉنتریش جریانیده محمد داوودخان عایله اعضالری بیلن بیرگه جمهورلیک سراییده اۉلدیریلگن، حاکمیت اېسه «خلق» و «پرچم» حزبلری قۉلیگه اۉتگن و نور محمد ترکی جمهور رییس اېتیب تعیینلنگن.
شوندن سۉنگ، ۱۳۵۸-ییلده سابق ساوېت اتفاقی قۉشینلری افغانستانگه کیریب کېلگن و مجاهد کوچلر بیلن ساویت قۉشینلری همده «خلق-پرچم» حکومتی اۉرتهسیده اوروش باشلنگن.
آخر-عاقبت، مجاهدلر ۱۳۷۱-ییل۸-ثورده کابلگه کیریب کېلیب، داکتر نجیبالله حکومتینی اغدریشگن.
بیراق مجاهد گروهلر غلبهدن سۉنگ اۉز ارا کېلیشه آلمهگن و بو نینگ نتیجهسیده مملکتده ایچکی اوروشلر باشلنیب، مینگلب آدملر هلاک بۉلگن همده میلیونلب آدملر اۉز اویلرینی ترک اېتیشگه مجبور بۉلگن.
