«تلگراف» گزېتهسینینگ خبر بېریشیچه، بریتانیا رسميلری افغانستانلیک باشپناه سۉراوچیلرنینگ عریضهلری رد اېتیلگنلرینی چیقریب یوباریش مسألهسیده طالبلر بیلن مذاکره آلیب بارگن.
طالبلر ایچکی ایشلر وزیرلیگی سۉزلاوچیسی عبدالمتین قانعنینگ ایتیشیچه، بو بارهده بریتانيا رسميلری بیلن کابلده مذاکرهلر و اوچرهشوولر اۉتکزیلگن.
بو مذاکرهلر بریتانيا ایچکی ایشلر وزیری شبانه محمود مملکتی افغانستانگه مهاجرلرنی چیقریب یوباریش مسألهسیده طالبلر بیلن مذاکره احتمالینی کۉریب چیقهیاتگنینی ایتگنیدن سۉنگ آشکار بۉلدی. اونگه کۉره، بو مسأله ایچکی درجهده محاکمه قیلینماقده.
اونینگ قۉشیمچه قیلیشیچه، بریتانيا باشقه اروپا دولتلرینینگ بو بارهدهگی حرکتلرینی هم کوزهتیب بارماقده و مانیتورینگنی دوام اېتتیرهدی.
«تلگراف» خبریگه کۉره، شبانه محمود مهاجرلرنی چیقریب یوباریش بۉییچه مذاکرهلرنی رد اېتهدیمی، دېب سۉرهلگنده، او: «مېن بونی رد هم اېتمهیمن، تصدیقلهمهیمن هم. حکومت ایچیده دوام اېتهیاتگن باشقه مذاکرهلر حقیده ایضاح بېریشنی ایستهمهیمن»، دېگن.
طالبلر ایچکی ایشلر وزیرلیگی سۉزلاوچیسی اېسه «بو بارهده بحثلر بار و بیز برچهنی قوتلهیمیز. بیز بریتانيا حکومتی بیلن بو مسألهده مذاکره آلیب باریهپمیز، اولرنینگ هیئتلری بعضاً کابلگه کېلهدی. بیز اولر بیلن گپلشیهپمیز و همکارلیک قیلیهپمیز. اولر تېز آرهده ینه کېلهدی »دېگن.
اونینگ قۉشیمچه قیلیشیچه، طالبلر بو باشپناه سۉراوچیلرنی قبول قیلیش اوچون هېچ قندهی شرط قۉیمهگن و اولرنی قبول قیلیش عوضیگه تن آلینیشی یاکه پول طلب قیلینهیاتگنی حقیدهگی دعوالرنی رد اېتگن.
عبدالمتین قانع کۉپهیتیریشیچه«انیقکی، اولر افغانلرنی اۉز وطنیگه قَیتریشنی خواهلهیپتی. بو اولرنینگ اویی. اگر بریتانيا یاکه باشقه دولت افغانلرنی یوبارماقچی بۉلسه، بیز اولرنی قبول قیلهمیز و کوتیب آلهمیز. بو یېرده تن آلیش یاکه باشقه نرسه حقیده گپ یۉق.»
حاضرده بریتانيا طالبلر حکومتینی تن آلمهیدی، شو سببلی باشپناه عریضهلری رد اېتیلگن مهاجرلرنی مجبورن افغانستانگه دېپورت قیله آلمهیدی.
اۉتگن ییلی بریتانيا یېتّی مینگ 330 کیشی افغانستانلیک باشپناه سۉراوچینینگ عریضهسینی رد اېتگن، جملهدن بیر مینگ 670 کیشی کیچیک قَییقلرده مانش کانالی آرقهلی کیریب کېلگن.
شونگه قرهمهی، فقط 135 کیشی مجبورن یاکه اختیاري روشده چیقریب یوباریلگن، مینگلب آدملر اېسه هنوز بریتانياده قالیب، باشپناه سۉرهش یاکه تجدید نظر کوتهیپتی.
اروپا دولتلری باشپناه عریضهلری رد اېتیلگن مهاجرلرنی افغانستانگه قَیتریش یۉلینی ایزلهماقده.
سۉنگّی پیتلرده اولر بو بارهده طالبلر بیلن علاقهلرنی کوچهیتیرگن و خبرلرگه کۉره، یقین هفتهلرده طالبلرنینگ تخنیکي هیئتی بروکسلگه و اروپا کمیسیونیگه مذاکرهلر اوچون باریشی کوتیلماقده.
