کنيانینگ عالي محکمهسی افغانستان پارلمانینینگ سابق اعضاسی ظاهر قدیرنی امریکاگه استرداد اېتیلیش حقیدهگی قرارنی تصدیقلهدی؛ او یېرده او قورال و مخدر مادّهلر قاچاقی عیبلاولری بیلن محکمه قیلینهدی.
«دیلینیشن افریقا»، نشری نینگ خبریگه کۉره، کنيانینگ عالي محکمهسی مملکت مخدر مادّهلر و ناقانوني قورال سوداسیگه قرشی کورهشیش بارهسیدهگی مجبوريتلریدن چېتگه چیقه آلمهسلیگینی ایتگن. شونینگدېک، دستلبکی محکمه ظاهر قدیرنی امریکاگه استرداد قیلیش تۉغریسیده قرار چیقریشده قانوننی تۉغری قۉلهگنینی تأکیدلهگن.
عالي محکمه ینه شونی هم بیلدیرگنکی، ظاهر قدیرنی امریکا رسميلریگه تاپشیریش قراری تۉغری و حقوقي جهتدن مجبوريدیر، چونکه کنيا مخدر مادّهلر قاچاقیگه قرشی کورهش بۉییچه خلقارا شرطنامهلر نینگ امضاچیلریدن بیری دیر.
اۉتگن ییلی نایروبی شهریدهگی (کنيا پایتختی) دستلبکی محکمهسی اقش نینگ ظاهر قدیرنی استرداد قیلیش حقیدهگی سۉراوینی قناعتلنتیرگن اېدی.
ظاهر قدیر اوشبو قرارنی قبول قیلمهی، اۉزیگه قۉییلگن عیبلاولرنی سیاسي دېب اتهدی. اونینگ وکیل مدافعسی استردادنی تۉختهتیش اوچون تلاش قیلگن، اما بو اورینیش آخر-عاقبت موفقیتسیز توگهگن.
ظاهر قدیر 2025-ییل اپرېل آییده «قطر ایرویز» پرواز بیلن نایروبیگه کېلگنیده، او تورگن مهمانخانهدن قۉلگه آلینگن.
شوندن سۉنگ امریکانینگ نیویارک شتاتیدهگی حدودي محکمهسی تامانیدن اونگه نسبتاً «مخدر مادّهلرنی ایمپورت قیلیش اوچون تیل بیریکتیریش» و «آغیر قوراللرگه اېگهلیک قیلیش» عیبلاولری بیلن حبسگه آلیش حکمی چیقریلگن. امریکا رسميلری کنياگه رسمي نوت یوباریب، اونی استرداد قیلیشنی سۉرهشگن.
ظاهر قدیر افغانستان نینگ اوّلگی حکومتی دوریده ننگرهار ولایتی وکیلی صفتیده پارلمان اعضاسی بۉلگن و حتا پارلمان رئیسی نینگ اۉرینباسری لوازمیگچه یېتگن.
طالبان ینه حاکمیتنی اېگهلهگنیدن سۉنگ، او مملکت ایچیده قالگن، اوشبو گروهنینگ اَیریم رسميلری بیلن اوچرهشگن و طالبان سیاستینی قۉللب-قوّتلهگن.
